Prezident tashabbusi bilan 100 kishiga bepul Haj yo‘llanmasi berildi

O‘zbekiston prezidentining tashabbusi bilan, 100 nafar vatandosh “Prezident hojisi” sifatida Haj safariga bepul yuborilmoqda.

Toshkent shahar hokimi Shavkat Umrzoqov bo‘lajak hojilardan biriga bepul yo‘llanmani taqdim etmoqda. / “O‘zbekiston 24” lavhasidan kadr

Ularga Haj safari yo‘llanmasi joylarda tantanali tarzda topshirilyapti. Bu haqda “O‘zbekiston 24” telekanali xabar berdi.

Musulmonlar idorasi raisining birinchi o‘rinbosari Homidjon Ishmetbekovning so‘zlariga ko‘ra, bepul yo‘llanma taqdim etilganlar orasida turli soha vakillari bor.

“Yurtimiz, xalqimiz uchun xizmat qilib umrini o‘tkazgan, loyiq-munosib bo‘lganlardan 100 nafarini muhtaram yurtboshimiz bu yil Haj safariga yuboryapti. O‘zbekiston O‘zbekiston bo‘libdiki, bunaqa voqeani ko‘rmagan...

Hajga ketayotganlar orasida oddiy farroshi ham bor, oddiy xizmatchisi ham bor, olimi ham bor, tabibi, vrachi ham bor, eng og‘ir zamonda diniy sohada ishlab ketganlarning yaqinlari bor. Demak, jamiyatimizdagi har soha vakillaridan bor”, – dedi Homidjon Ishmetbekov.

Eslatib o‘tamiz, joriy yilda ham Hajga O‘zbekistondan 15 ming ziyoratchi yo‘l olmoqda. 2 maydan 18 mayga qadar O‘zbekistondagi 9 ta aeroportdan Madinaga parvozlar davom etyapti.

Haj safarining narxi 77 mln so‘m deb belgilangan.