Dog‘istonda saqlanayotgan 24 nafar o‘zbekistonlik vatanga qaytariladi

Rossiyaning Dog‘iston Respublikasidagi vaqtinchalik saqlash markazida bo‘lib turgan 24 nafar O‘zbekiston fuqarosini vatanga qaytarish jarayonlarini jadallashtirish bo‘yicha kelishuvga erishildi. Bu masala O‘zbekiston diplomatlarining Mahachqal’aga amalga oshirgan tashrifi doirasida muhokama qilindi.

Foto: Dunyo

Ma’lum qilinishicha, O‘zbekiston diplomatlari vatandoshlar murojaatlarini o‘rganish va mintaqaning vakolatli idoralari bilan hamkorlikni mustahkamlash maqsadida Dog‘istonga tashrif buyurgan.

Tashrif davomida Rossiya Ichki ishlar vazirligining Dog‘iston Respublikasi bo‘yicha Migratsiya masalalari boshqarmasi, Mahachqal’a shahridagi Xorijiy fuqarolarni vaqtincha saqlash markazi rahbariyati hamda tegishli idoralar vakillari bilan uchrashuvlar o‘tkazildi.

Muzokaralarda O‘zbekiston fuqarolarining huquq va qonuniy manfaatlarini himoya qilish, tezkor axborot almashish mexanizmlarini takomillashtirish va ma’muriy huquqbuzarliklar uchun vaqtincha saqlash markaziga joylashtirilgan fuqarolarni vatanga qaytarish tartibini tezlashtirish masalalari muhokama qilindi.

Shuningdek, Rostov-Don shahridagi O‘zbekiston Bosh konsulxonasi bilan doimiy hamkorlik qilish uchun mas’ul xodim biriktirish bo‘yicha kelishuvga erishildi.

Diplomatlar Mahachqal’adagi vaqtincha saqlash markazida sayyor konsullik qabullarini ham o‘tkazdi. Unda O‘zbekiston fuqarolari bilan suhbatlar tashkil qilinib, ularning murojaat va muammolari o‘rganildi hamda zarur konsullik-huquqiy ma’lumotlar taqdim etildi.

Uchrashuvlar yakunida amaldagi qonunchilik doirasida 24 nafar O‘zbekiston fuqarosini vatanga qaytarish jarayonlarini tezlashtirishga kelishib olindi.