Italiya hukumati Sitsiliya mafiyasining millionlab yevro aktivlarini musodara qildi

Italiya rasmiylari xabariga ko‘ra, operatsiya nafaqat Italiyada, balki Andorra, Gibraltar, Kayman orollari, Lyuksemburg, Shveytsariya, Livan, Monako va Ispaniyada ham o‘tkazilgan. Xususan, Sitsiliyada va Ispaniyaning Malaga shahrida keng ko‘lamli tintuvlar o‘tkazildi va operatsiyada jami 150 dan ortiq kishi ishtirok etdi. Bu haqda BBC xabar berdi.

Ma’lum qilinishicha, rasmiylar naqd pul yashirilgan joylarni topish uchun dronlar va teplovizorlardan foydalangan, shuningdek, raqamli hamyonlar va kriptovalutalarni kuzatish uchun IT mutaxassislarini jalb qilgan.

BBC muxbiri Sara Reynsfordning yozishicha, Italiya ommaviy axborot vositalari musodara qilingan narsalarni «Denaroning giyohvand moddalar ombori» deb ataydi, biroq musodara qilingan mablag‘ uning jinoiy tarmog‘i ulkan boyligining faqat kichik bir qismini tashkil etadi.

Messina Denaro 2023 yilda saraton kasalligidan davolanayotgan klinikadan chiqayotganda hibsga olindi. U 30 yil davomida yashirinib yurgan edi. Ko‘p o‘tmay, u 61 yoshida qamoqda vafot etdi.

2002 yilda u 1992 yilda mafiya jinoyatlarini tergov qilgan prokurorlar Jovanni Falkone va Paolo Borsellinoni o‘ldirgani uchun sirtdan umrbod qamoq jazosiga hukm qilingan edi.

Ma’lum qilinishicha, keng ko‘lamli operatsiya natijasida uch kishi hibsga olingan va Ispaniya, Gibraltar va Kayman orollarida ko‘chmas mulkka sarmoya kiritish bilan shug‘ullangan va guruhning noqonuniy harakatlari bilan bog‘liq bo‘lgan sakkizta kompaniya aniqlangan.

Musodara qilingan mablag‘lar, ehtimol, mafiya tomonidan 40 yildan ortiq vaqt davomida olib borilgan giyohvand moddalar savdosidan olingan daromaddir. Rasmiylarga ko‘ra, ular bir qator aktivlar, jumladan, Ispaniya qirg‘oqlaridagi kurortlar orqali «yuvilgan».

Italiya mafiya va terrorizmga qarshi kurash milliy prokuraturasi (DNAA) rahbari Jovanni Melilloning aytishicha, operatsiya nafaqat musodara qilingan mablag‘lar hajmi uchun «strategik ahamiyatga ega» bo‘lgan.

«Operatsiyadan ko‘zlangan maqsad ham bir necha yil oldin mavjud bo‘lgan jinoiy tashkilotning qayta tiklanishiga yo‘l qo‘ymaslik edi», dedi u matbuot anjumanida.

Italiya moliya politsiyasining xabar berishicha, operatsiya Andorra rasmiylarining knyazlik hududida «katta moliyaviy resurslarga» ega bo‘lgan italiyalik ayol (Sitsiliya orolida yashovchi) haqidagi xabari bilan boshlangan.

Tekshiruvlar davomida u ilgari bir necha bor sudlangan va «Koza Nostra» va Matteo Denaro bilan yaqin aloqada bo‘lgan giyohvand moddalar sotuvchisiga turmushga chiqqani aniqlandi.