O‘zbekistonga telefon olib kirishdagi cheklovlar yumshatiladi, ammo ularni majburiy deklaratsiyalash joriy etilmoqda

Vazirlar Mahkamasining 26 oktyabrdagi qarori bilan O‘zbekiston hududida foydalanilayotgan, sotish yoki shaxsiy foydalanish uchun olib kiriladigan mobil qurilmalarni ro‘yxatga olish tartibi yanada takomillashtirilishi munosabati bilan hukumat ayrim qarorlariga o‘zgartirish va qo‘shimchalar kiritildi.

Endi havo yo‘llari orqali respublikaga kirib kelayotgan jismoniy shaxslar har kelganida 2 dona telefon apparati, shu jumladan, mobil aloqa moduliga ega bo‘lgan mobil telefonlar va qurilmalarni bojxona to‘lovlarisiz olib kirishi mumkin.

2024 yil 28 yanvardan kuchga kiradigan o‘zgartirishlarga ko‘ra, ushbu tovarlarning qiymati respublikaga aviatsiya o‘tkazish punktlari orqali olib kirishda jismoniy shaxslar uchun bojxona to‘lovlariga tortilmaydigan tovarlarning cheklangan qiymati – 2000 AQSh dollari tarkibiga kiritiladi.

Jismoniy shaxsning yonida olib kirgan barcha tovarlari, shu jumladan telefonlarning umumiy qiymati 2000 AQSh dollaridan oshgan taqdirda belgilangan tartibda bojxona to‘lovlari undiriladi. 

Endi jismoniy shaxslar tomonidan mobil qurilmalarni olib kirishda bojxona to‘lovlari undirilmaydigan cheklangan me’yorlaridan qat’iy nazar, deklaratsiya to‘ldiriladi. Ularni olib kiruvchi fuqarolar «qizil» yo‘lak bo‘ylab chegaradan o‘tib, bojxonachilar orqali deklaratsiya to‘ldirishi shart.