Dog‘iston aeroportida Isroildan uchib kelgan samolyot tufayli tartibsizliklar sodir bo‘ldi

Dog‘iston hokimiyati hamda Rossiyadagi musulmon va yahudiy konfessiyalari vakillari Mahachqal’a aeroportidagi tartibsizliklarni qoraladi.

Mahachqal’a aeroportida 29 oktyabr, yakshanba kuni Tel-Avivdan uchib kelgan samolyot atrofida tartibsizliklar sodir bo‘ldi. Hodisa «millatlararo adovatni qo‘zg‘atishga qaratilgan va inson huquqlarining qo‘pol buzilishiga olib kelishi mumkinligi aniq», dedi Rossiya Federatsiyasidagi inson huquqlari bo‘yicha vakil Tatyana Moskalkova.

Uning fikricha, Mahachqal’a aeroportidagi tartibsizliklarni qo‘zg‘atuvchilarning maqsadi «Rossiyada fuqarolar tinchligini buzish» bo‘lgan.

Mahachqal’a aeroportidagi tartibsizliklar

29 oktyabr oqshomida Tel-Avivdan Mahachqal’aga Red Wings aviakompaniyasining muntazam reysi yetib kelishidan biroz oldin aeroportda bir necha yuzlab odamlar yig‘ildi. Axborot agentligi suratlarida ularning ba’zilari Falastin bayroqlarini hilpiratganini ko‘rish mumkin. OAV va Telegram-kanallari xabarlariga ko‘ra, agressiv olomon uchish-qo‘nish yo‘lagiga bostirib kirgan. Yig‘ilganlar aeroportdan chiqayotgan mashinalarni to‘xtatgan, u yerdagilarning pasportlari ruxsatsiz tekshirilgan.

Politsiya darhol tartibni tiklay olmadi. Internetda paydo bo‘lgan suratlarda tartibsizliklarda qatnashganlar politsiyaga turli narsalarni uloqtirganini ko‘rish mumkin. Dog‘iston Sog‘liqni saqlash vazirligi ma’lumotlariga ko‘ra, tartibsizliklar natijasida 20 kishi, jumladan, politsiya xodimlari ham jabrlangan. 

Mahachqal’a aeroporti faoliyati 6 noyabrga qadar to‘xtatildi. 30 oktyabrga o‘tar kechasi Rossiya gvardiyasining maxsus bo‘linmalari Mahachqal’aga yetib keldi. Tergov qo‘mitasining Dog‘iston bo‘yicha departamenti ommaviy tartibsizliklar fakti bo‘yicha jinoiy ish qo‘zg‘atdi. 

Rossiyada ushbu xatti-harakat tanqid qilindi

Namoyishchilarning xatti-harakatlari Dog‘iston rahbari Sergey Melikov, Dog‘iston muftiysi, Rossiya Federatsiyasi musulmonlari diniy boshqarmasi, Rossiya yahudiylari kongressi va boshqa ko‘plab tashkilotlar tomonidan tanqid qilindi. 

Musulmon va yahudiy diniy jamoalari vakillari «Kommersant» gazetasiga bergan intervyusida Shimoliy Kavkazdagi voqealarni sharhlar ekan, dindoshlarni provokatsiyalarga berilmaslik va dinlararo totuvlikni saqlashga, rasmiylarni esa nima bo‘lganini tushunib, jinoyatchilarni javobgarlikka tortishga chaqirdi.

Rossiya matbuotiga ko‘ra, Mahachqal’a aeroportidagi voqealardan oldin Xasavyurt, Cherkessk va Nalchikda namoyishlar bo‘lib o‘tgan, u yerda qurilayotgan yahudiy madaniyat markazi yoqib yuborilgan. 

Isroil rasmiylari Moskvani Rossiya hududida yahudiylar va isroilliklarning xavfsizligini ta’minlashga chaqirdi.