OAV va blogerlar o‘rtasida «Zakovat» turniri o‘tkaziladi

Turnirda O‘zbekistonda rasman faoliyat ko‘rsatayotgan barcha ommaviy axborot vositalari jamoasi, shuningdek blogerlardan tarkib topgan erkin jamoalar ishtirok eta oladi.

Turnirning umumiy sovrin jamg‘armasi 200 million so‘m. Bunda: 1-o‘rin — 100 million so‘m; 2-o‘rin — 60 million so‘m; 3-o‘rin — 30 million so‘m; 4-o‘rin — 10 million so‘m bilan mukofotlanadi.

Har bir OAV nomidan 1 ta jamoa ishtirok etishi mumkin va tarkibga kiritilgan ishtirokchilar ushbu OAVda rasmiy mehnat shartnomasi bilan ishlayotgan xodim bo‘lishi shart, blogerlar uchun bunday talab yo‘q.

Jamoalar tarkibi 6 nafar asosiy va 1 nafar zaxira ishtirokchidan iborat bo‘ladi, zaxira ishtirokchi majburiy emas. Jamoalar tarkibida “Zakovat” klubining professional bilimdonlari bo‘lishiga ruxsat berilmaydi.

Turnirda ishtirok etish uchun OAVlar ariza to‘ldirgan holda, OAV rahbari yoki bosh muharririning imzosi hamda tashkilot muhri bilan birgalikda oav@zakovat.tv elektron pochtasi orqali ariza yuborishlari lozim. Blogerlar esa www.zakovat.tv/blogerlar manzili orqali o‘tib, maxsus anketani to‘ldirib yuborishlari lozim. Arizalar 2022 yilning 5 may kuniga qadar (shu kuni ham) qabul qilinadi.