Anons. Bugun YeChLning Ye, F, G va N guruhlarida birinchi tur o‘yinlari o‘tkaziladi

15 sentabr oqshomida boshlangan YeChLning ilk turi bugun yana 4ta guruhdagi 8ta o‘yin orqali davom ettiriladi.

Ye guruhi

Roma - Barselona

Bugungi o‘yinlar orasida eng markaziy maqomidagisi Italiya poytaxti Rim shahrida o‘tkazilishi kutilmoqda. "Roma" turnirni o‘tgan mavsum chempioni "Barselona"ga qarshi o‘tkazadi.

Uchrashuv Toshkent vaqti bilan soat 23:45da boshlanadi va UzReport kanali orqali translyatsiya qilinadi.

Bu o‘yin Messi uchun YeChLdagi 100-o‘yin bo‘lishi kutilmoqda.

O‘zining sobiq jamoasiga qarshi o‘ynaydigan "Barselona" bosh murabbiyi Luis Enrike qatorasiga ikkinchi marta YeChLni yutish ishtiyoqidaligini aytgan.

Mezbonlar murabbiyi Rudi Garsiya esa bu o‘yinda shogirdlari hujumda o‘ynashi va ochko olishga harakat qilishi haqida aytgan.

Bayyer - BATE

Ye guruhining ikkinchi o‘yinida Germaniyaning "Bayyer" jamoasi guruh autsayderi sifatida qaralayotgan BATE (Belarus) jamoasini qabul qiladi. Bu mavsumni "aptekachilar" ko‘ngildagidek boshlay olmadi. Jamoa 3turdan keyin 3 ochko bilan 13-o‘rinda ketmoqda.

F guruhi

Dinamo Zagreb - Arsenal

"Arsenal" bu mavsumda ham "Bavariya" bilan bitta guruhdan joy olgan. Lekin guruhdagi yana ikki jamoa nisbatan kuchsiz sanaladi. Bugun "kanonirlar" shunday jamoalardan biri "Dinamo Zagreb"ga qarshi birinchi turni safarda o‘tkazadi.

Jamoa murabbiyi Arsen Venger ushbu o‘yinda Uilsher, Remzi va Belerin qatnasha olmasligini ma'lum qilgan.

Olimpiakos - Bavariya

"Bavariya" bu mavsumda ham turnir g‘olibligi uchun asosiy da'vogarlardan hisoblanmoqda. Jamoa Xosep Gvardiola rahbarligida hali YeChL holibi bo‘lishga erishmadi va "Olimpiakos"ga qarshi o‘yinda bu maqsad yo‘lidagi navbatdagi harakatini boshlaydi.

E guruhi

Chelsi - Makkabi T-A

"Chelsi" APLda ko‘rsatayotgan yomon natijalarini xalqaro maydondagi g‘alabalar orqali haspo‘shlashi mumkin. Qolaversa, jamoa nisbatan oson guruhdan joy olgan. Muxlislar Isroil chempionining Angliyada mag‘lub etilishiga shubha bildirishmayapti.

Mourino esa bu o‘yin uchun jiddiy o‘zgarishlar amalga oshirishini, Kosta, Terri, Matich va Ivanovichni «Makkabi»ga qarshi o‘yin tarkibiga kiritmoqchi emasligini bildirgan.

Dinamo Kiyev - Portu

Kiyevliklar bugun o‘z maydonida Portugaliyaning "Portu" jamoasini qabul qiladi. Bu o‘yinda ikkala jamoaning ham imkoniyatlari teng baholanmoqda.

H guruhi

Valensiya - Zenit

YeChLning yangi mavsumida Ispaniyadan qatnashayotgan beshinchi vakil "Valensiya" bugun o‘z maydonida "Zenit"ni qabul qilish orqali ishtirokini boshlaydi.

Gent - Lion

YeChL guruh bosqichida ahyon-ahyonda ko‘rinish beradigan Belgiyaning "Gent" jamoasi turnirning doimiy ishtirokchisi "Lion"ni qabul qiladi. Frantsuzlar tarkibida bu o‘yin arafasida asosiy yetakchi futbolchi Nabil Fekir jarohat tufayli uzoq muddatga safdan chiqdi, Lyakazet ham yaxshi sport formasida emas. Lekin bu o‘yinda "sherlar"ning imkoniyati yuqoriroq hisoblanmoqda.