Avtomobilni bojxonada birovning nomiga o‘tkazish qonun bilan taqiqlanishi mumkin

O‘zbekiston Vazirlar Mahkamasiga bojxona ombori rejimidagi tovarlarni boshqa shaxsga o‘tkazishni taqiqlash vakolati berilishi mumkin. Iqtisodiyot va moliya vazirligi tegishli qonun loyihasini jamoatchilik muhokamasiga chiqardi. Gap birinchi navbatda avtomobillar haqida ketyapti.

Qonun loyihasi bilan, Bojxona kodeksiga quyidagi mazmundagi band kiritish ko‘zda tutilmoqda:

“O‘zbekiston Respublikasi Vazirlar Mahkamasi bojxona ombori bojxona rejimiga joylashtirilgan tovarlarni boshqa shaxsga o‘tkazilishi taqiqlangan ayrim tovarlarni va holatlarni belgilashi mumkin”.

Rasmiy izohda keltirilishicha, qonun loyihasining ishlab chiqilishiga bosh vazirning 2025 yil 6 may kungi 1725-sonli topshirig‘i asos bo‘lgan.

Bu topshiriqda bojxona ombori bojxona rejimiga joylashtirilgan tovarlarni boshqa shaxsga o‘tkazish bo‘yicha tartibotlarni yengil avtotransport vositalariga qo‘llamaslik bo‘yicha qonun loyihasini ishlab chiqish vazifasi qo‘yilgan.

“Mazkur qonun bojxona nazorati ostida turgan tovarlarni soliq qonunchiligi talablarini bajarmagan holda bojxona rasmiylashtiruvidan o‘tkazish bilan bog‘liq holatlarning oldini olishga qaratilgan”, – deyiladi qonun loyihasining preambulasida.

Lekin qonun loyihasiga ilova qilingan tushuntirishda bunday holatlar haqida ma’lumot berilmagan.