AQSh Chexiyaga rossiyalik Nikulin ekstraditsiyasi uchun minnatdorlik bildirdi

AQSh Oq uyi matbuot kotibi Sara Sanders Chexiyaga rossiyalik Yevgeniy Nikulinning ekstraditsiyasi uchun minnatdorlik bildirdi, u hakerlik hujumlarida ayblanmoqda. Bu haqda RIA «Novosti» xabar berdi.

«Qo‘shma Shtatlar Chexiya Respublikasiga Yevgeniy Aleksandrovich Nikulin topshirilgani uchun minnatdorlik bildiradi, u, taxminlarga ko‘ra, LinkedIn, Dropbox va Formspring’ga tegishli kompyuterlarni buzib kirgan. Rossiya fuqarosi bo‘lgan Nikulin Chexiya huquqni muhofaza qilish organlari tomonidan hibsga olindi va Chexiyada 2016 yilning oktabr oyidan beri qamoqda saqlanayotgandi. Jinoyatchilarni javobgarlikka tortish internet ishonchililigini ta'minlash va bizning asosiy qadriyatlarimizni himoya etishning asosiy jihati sanaladi», - deyiladi Sanders bayonotida.

Qo‘shma Shtatlar Chexiya hukumatiga ekstraditsiya bo‘yicha masala «adolatli» hal etilgani uchun ham minnatdorlik izhor qilgan.