Qashqadaryoda mashinani yuqori tezlikda boshqargan haydovchi yo‘l-transport hodisasida vafot etdi

Qashqadaryo viloyati Qamashi tumanida sodir bo‘lgan yo‘l-transport hodisasida haydovchi vafot etgan. Bu haqda viloyat IIB YHXB xabar bermoqda.

Ma'lum qilinishicha, joriy yil 26 may kuni soat 15:30larda davlat ahamiyatiga ega 4R86 Qamashi-Langar-Maydanak avtomobil yo‘lining 12-kilometrida odam o‘limi bilan bog‘liq yo‘l-transport hodisasi ro‘y bergan. «Kobalt» mashinasi haydovchisi boshqaruvni yo‘qotib, yo‘l chetiga chiqib ketgan va mashina ag‘darilgan. Oqibatda haydovchi og‘ir tan jarohatlari olib, voqea joyida vafot etgan. «Kobalt»da yo‘lovchi sifatida ketayotgan shaxs esa shifoxonaga yotqizilgan.

Dastlabki surishtiruvda aniqlanishicha, haydovchi mashinani boshqarish jarayonida belgilangan me'yordan oshiq holda, juda yuqori tezlikda harakatlangan.

Qayd etilishicha, ushbu yo‘l-transport hodisasi yuzasidan Qamashi tuman IIB tergov bo‘limi tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan. Hozirda dastlabki tergov-surishtiruv olib borilmoqda.