Inson organlari savdosi bilan shug‘ullangan uyushgan jinoiy guruhga hukm o‘qildi

Inson organlari va to‘qimalari savdosi bilan shug‘ullangan uyushgan guruh a’zolari jinoiy jazoga tortildi. Bu haqda Kun.uz’ga Toshkent shahar sudlari matbuot xizmati xabar berdi.

Toshkent shahri, Toshkent, Farg‘ona, Buxoro hamda Qashqadaryo viloyatlarida yashovchi 12 nafar fuqarodan (4 nafari ayol) iborat jinoiy guruh ijtimoiy tarmoqlar orqali buyrak va jigar kasalliklaridan aziyat chekayotgan bemorlarni topgan. So‘ngra sog‘lom fuqarolarni mo‘may pul evaziga o‘z organini sotishga qiziqtirgan. Shu tariqa chet eldagi tanishlari yordamida shaxsini tasdiqlovchi hujjatlarni qalbakilashtirish orqali ularni go‘yoki qarindosh sifatida ko‘rsatgan va qo‘shni davlatlarning biridagi xususiy klinikada jarrohlik amaliyotlarini amalga oshirgan.

Uyushgan jinoiy guruhning 2023-2025 yillardagi faoliyati davomida 32 nafar bemorga buyrak yoki jigar to‘qimalari ko‘chirib o‘tkazilgan. O‘z navbatida, bemorlardan olingan katta miqdordagi pul mablag‘larining ma’lum bir qismi operatsiya uchun xususiy klinikaga hamda donorlarga berilgan, qolgani esa o‘zaro taqsimlangan.

Guruh a’zolariga nisbatan qo‘zg‘atilgan jinoyat ishi JIB Yakkasaroy tuman sudida sudya Azimjon Hakimov raisligida ko‘rib chiqilib, hukm o‘qildi. Jinoiy guruh a’zolari Jinoyat kodeksining 133-1-moddasi (inson a’zolarining va (yoki) to‘qimalarining oldi-sotdisi), 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish), 246-moddasi (kontrabanda) va 273-moddasida (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish) nazarda tutilgan jinoyatlarni sodir qilishda aybli deb topildi. 

Sudlanuvchilarning 8 nafariga 3 yil 1 oydan 10 yil 1 oygacha bo‘lgan muddatlarga ozodlikdan mahrum qilish jazosi tayinlandi. Qolgan sudlanuvchilarga ozodlikni cheklash hamda axloq tuzatish ishlari bilan bog‘liq jazolar qo‘llandi. 

Avvalroq ushbu jinoiy guruh faoliyati fosh etilgani xabar qilingandi.