Bugun, 30 aprel kuni Alisher Navoiy nomidagi o‘zbek tili va adabiyoti universiteti tadbirlar zalida shoir Safar Olloyorning «Odam va omad» nomli asari taqdimoti bo‘lib o‘tdi.
Tadbirda adabiyotshunos olim va shoirlar, universitet talabalari, ijodkorning muxlislari va oila a'zolari, shuningdek, OAV xodimlari ishtirok etdi.
«Odam va omad» kitobi sakkiz dostonni o‘z tarkibiga olgan («Saxovat sarobi», «Muhojirlik - muhtojlik», «Nomsiz Armon», «Serreja rejissyor», «Tilsiz tilsim», «Ermak ertak», «Odam va Hayqiriq») zarbuldoston turkum hisoblanadi.
Qiyoslash uchun, shu paytga qadar xalq og‘zaki ijodida qirqdan ortiq dostonlarni birlashtirgan «Go‘ro‘g‘li», yozma adabiyotda «xamsa»chilik an'analari, shuningdek, Chori Ergashning yigirma dostondan iborat «Rahmon vasvasi» turkum janrida yaratilgan asarlar sirasiga kiradi.
Kitob taqdimotida so‘zga chiqqanlar, «Odam va omad» asarining mazmun-mohiyati, uning kitob shakliga kelguncha bo‘lgan jarayonlar, shuningdek muallif haqida o‘z fikrlarini bildirishdi.
«Odam va omad» asarini o‘qiganlarning ko‘pchiligi unga zarbuldostoni nimasi tag‘in, shunaqasiyam bor ekanmi deganday qaradilar. Aslida biror bitikning qandayligi uning tasavvurimizga mos kelish-kelmasligi bilan belgilanmaydi. E'tiborimizga sakkiz doston qo‘shiluvidan hosil bo‘lgan bitta zarbuldoston asari havola qilingan. Bitikning yaxlitligi nimada? Sakkiz butunlikni o‘zaro birlashtirib turuvchi mohiyat nimadan iborat? Bu dostonlar sakkizligida nima bor o‘zi? Ulardagi tasvir o‘quvchiga nimasi bilan qiziqarli va badiiy-estetik jihatdan ahamiyatli? Bitikni o‘qish asnosida shu savollarga javob izlansa, maqsadga muvofiq bo‘ladi. O‘quvchi ham, sinchi olim ham asardan unda yo‘q narsani emas, bor narsani qidirgani ma'qul.
