Avvalroq, ayrim Telegram kanallar va ijtimoiy tarmoqlarda bosh prokuror Otabek Murodov lavozimini tark etgani hamda uning o‘rnini ichki ishlar vaziri Po‘lat Bobojonov egallagani haqida ma'lumot paydo bo‘ldi.
Shu bilan birga, Bosh prokuratura matbuot xizmati o‘shandayoq bosh prokuror Otabek Murodov mahkamadagi o‘z ishini davom ettirayotgani to‘g‘risida ma'lum qildi.
Bundan tashqari, O‘zA xabariga ko‘ra, Nukus shahrida joriy yil sentabr oyida o‘z faoliyatini boshlashi kutilayotgan Prezident maktabining qurilish ishlari boshlandi. Muassasaga tamal toshi qo‘yilishi munosabati bilan tashkil etilgan tadbirda davlat va jamoat tashkilotlari mas'ullari, jamoatchilik vakillari, ommaviy axborot vositalari xodimlari ishtirok etgan.
Ushbu ta'lim muassasasining asosiy maqsadi hududlarda iqtidorli yoshlarni aniqlash va ularning har tomonlama yanada yuksalishi uchun zarur sharoitlar yaratishdir. Eng qobiliyatli o‘quvchilar tanlab olinadigan bu maktabda yoshlarga matematika, fizika, kimyo, biologiya fanlari, axborot texnologiyalari va xorijiy tillar ilg‘or ta'lim uslublari asosida chuqur o‘rgatiladi.
Prezident maktabi qurilishi boshlanishiga bag‘ishlangan tadbirda O‘zbekiston Respublikasi bosh vazirining birinchi o‘rinbosari O.Ramatov, O‘zbekiston Respublikasi bosh prokurori O.Murodov ishtirok etgan.
Bugun, 11 mart kuni, Bosh prokuratura matbuot xizmati Otabek Murodov hozirda mamlakat rahbariyati topshirig‘i bilan Navoiy viloyatida bo‘lib turgani haqida xabar berdi. U viloyatga ijtimoiy-iqtisodiy rivojlantirish masalalari yuzasidan kelgan.
