Xivada IIB xodimi pora olayotganda ashyoviy dalillar bilan ushlandi

Xorazm viloyati IIB Tezkor qidiruv xizmatining katta tezkor vakili Xiva shahri hududida qishloq xo‘jaligi mahsulotlari ekish uchun ajratilgan 12 sotix yer maydonida uy-joy qurish bo‘yicha ruxsat olib berishni va’da qilganlikda gumonlanmoqda. Dastlabki ma’lumotlarga ko‘ra, u hokimiyat idoralarida ishlovchi mansabdor tanishlari orqali mazkur masalada “ruxsat”ni hal qilib berishini aytib, buning evaziga fuqarodan 30 ming AQSh dollari olgan.

Mazkur mablag‘ni olish jarayonida Davlat xavfsizlik xizmati, Iqtisodiy jinoyatlarga qarshi kurashish departamenti hamda Ichki ishlar vazirligining Shaxsiy xavfsizlik bosh boshqarmasi xodimlari tomonidan tezkor tadbir o‘tkazilgan. Natijada gumonlanuvchi shaxs ashyoviy dalillar bilan ushlangan.

Hozirda unga nisbatan Jinoyat kodeksining 168-moddasi 4-qismi “a” bandi hamda 28, 211-moddasi 3-qismi “a” bandi bilan jinoyat ishi qo‘zg‘atilgan. Shuningdek, tergov organi qaroriga ko‘ra, gumonlanuvchiga nisbatan “qamoq” ehtiyot chorasi qo‘llangan.

Shu kabi yer munosabatlari bilan bog‘liq yana bir holat Farg‘ona viloyatida ham qayd etilgan. U yerda ikki shaxs imtiyozli shartlarda ajratilgan jami 3 gektar yer maydonini “tanishlar orqali” xaridor nomiga rasmiylashtirib berishni va’da qilib, pul talab qilgan vaqtda qo‘lga olingan. Ushbu holat bo‘yicha ham jinoyat ishi qo‘zg‘atilib, tergov harakatlari davom etmoqda.