Qashqadaryoda 14 yoshli o‘smir boshqaruvidagi Gentra YTHga uchradi. Qurbonlar bor

Qarshi tumanida insonlar o‘limi bilan bog‘liq YTH sodir bo‘ldi. Bu haqda Hudud dasturida xabar berildi.

Ma’lum qilinishicha, YTH joriy yil 19 aprel kuni Qarshi tumani Qozikent mahallasi hududida sodir bo‘lgan. 14 yoshli o‘smir otasining Gentra mashinasini uning ruxsatisiz ko‘chaga haydab chiqqan. O‘smirning yonida tengqur do‘stlari bo‘lgan.

2011 yilda tug‘ilgan maktab o‘quvchisi mashinani tez haydashi oqibatida boshqaruvni yo‘qotgan va yo‘l chetida to‘xtab turgan yuk mashinasiga borib urilgan. YTH oqibatida mashinada bo‘lgan 2 nafar o‘smir voqea joyida vafot etgan.

Shuningdek, haydovchi va mashinada bo‘lgan yana 2 nafar o‘smir tan jarohatlari olib, shifoxonaga yotqizilgan. Hozirda ulardan ikkisining ahvoli o‘ta og‘ir, biriniki esa o‘rta og‘ir darajada ekani bildirilgan.

Holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 3-qismi bilan jinoyat ishi qo‘zg‘atilgan. Hozirda surishtiruv harakatlari olib borilmoqda.

Avvalroq Namanganda 16 yoshli qiz boshqaruvidagi Spark kanalga tushib ketishi oqibatida qizning onasi va singlisi vafot etgan edi.