O‘zbekistonda 6 oy davomida 6 nafar maktab o‘quvchisida erta homiladorlik aniqlangan - vazirlik

2023 yilning dastlabki 6 oyi davomida (yanvar–iyun) O‘zbekistondagi umumta’lim muassasalarida 6ta erta homiladorlik holati aniqlangan. Bu haqda Maktabgacha va maktab ta’limi vazirligi boshqarma boshlig‘i o‘rinbosari Azamat Kamolov 31 iyul kuni o‘tkazilgan matbuot anjumanida ma’lum qildi.

Unga ko‘ra, 2023 yilning 6 oyi davomida 5ta hudud: Qoraqalpog‘iston (1ta), Qashqadaryo (2ta) Samarqand (1ta), Sirdaryo (1ta), Surxondaryo (1ta) viloyatlarida tahsil olayotgan jami 6 nafar o‘quvchi qizda erta homiladorlik aniqlangan. Kamolovning qayd etishicha, holatlarning aksariyati maktabdan tashqari vaqtda yoki yozgi ta’til paytida sodir bo‘lgan. 

«Bularning hammasi umumta’lim maktablaridagi emas, oilalardagi holat. Ularning oldini olish bo‘yicha o‘quvchi qizlar o‘rtasida ularni oila hayotiga tayyorlash, sog‘liqni saqlash xodimlari bilan oqibatlarni tushuntirish mumkin bo‘lgan ko‘plab tadbirlar o‘tkaziladi. 

Lekin tahlil qilganimizda, aksariyat hollarda [bunday holatlar] yozgi ta’til davrida yoki maktabdan tashqarida bo‘lgan davrda yuzaga kelishi aniqlangan. Ammo bu maktablar mas’uliyatni zimmasiga olmaydi degani emas. Shuning uchun birinchi navbatda ota-onalar, sinf rahbarlar bilan hamkorlikda bu boradagi ishlar doimiy yo‘lga qo‘yilgan», – deydi Kamolov.

Ta’kidlanishicha, maktablarda erta homiladorlik, erta tug‘uruqning oldini olish bo‘yicha Oila va xotin-qizlar qo‘mitasi, joylardagi mahalla faollari, xotin-qizlar faoli, maktab psixologi, sinf rahbari, ma’naviy-ma’rifiy ishlar bo‘yicha direktor o‘rinbosarlari bilan hamkorlikda ishlar olib borilmoqda.