«PSJ» muhim o‘yinlar oldidan yetakchilarisiz qoldi

«PSJ» yarim himoyachilari Tyaggo Motta va Anxel Di Mariya Fransiya chempionatining 35-turi doirasida «Nitstsa»ga qarshi kechgan o‘yinda (1:3) maydondan chetlatilgani uchun tartib-intizom qo‘mitasi qarori bilan ikki o‘yinga diskvalifikatsiya qilindi. Argentinalik futbolchi esa qo‘shimcha tarzda yana bir uchrashuvga shartli ravishda diskvalifikatsiya oldi, deb xabar bermoqda L`Equipe. 

Motta raqibiga zarba bergani uchun 90-daqiqada qizil kartochka olgan bo‘lsa, Di Mariya – qo‘shib berilgan vaqtning uchinchi daqiqasida qo‘pollik bilan raqibini chalib yiqitgani uchun maydondan haydaldi. Har ikki o‘yinchi to‘g‘ridan-to‘g‘ri qizil kartochka olgan. Shu tariqa, Motta va Di Mariya «Bastiya» hamda «Sent-Eten» bilan o‘yinlarni o‘tkazib yuboradi hamda so‘nggi, 38-tur doirasida o‘z uy stadionlarida «Kan» bilan bo‘lib o‘tadigan uchrashuvda ishtirok etishi mumkin. Bahs 20 may kuni bo‘lib o‘tadi.