2026 yildan ko‘p qavatli uyga qo‘shimcha qavat qo‘shish uchun loyihani qayta rasmiylashtirish taqiqlanadi

“Bino va inshootlarning zilzilabardoshligi va seysmik xavfsizligini ta’minlashda davlat nazorati va boshqaruvini yanada takomillashtirish chora-tadbirlari to‘g‘risida”gi prezident farmoniga muvofiq, 2026 yil 1 yanvardan bir qator yangi tartiblar joriy etiladi.

Farmonga ko‘ra:

• milliy normativ hujjatlarga nomutanosib bo‘lgan qismlar uchun kompensatsiyalovchi choralar asosida ishlab chiqilgan loyiha hujjatlarining ekspertizasi faqat “Shaharsozlik hujjatlarini ekspertiza qilish respublika markazi” davlat muassasasi tomonidan amalga oshiriladi;
• obektlarning zilzilabardoshligi bo‘yicha ilmiy hamda loyiha hujjatlarining smeta qismidan tashqari shaharsozlik hujjatlari ekspertizasi xulosalarini tavsiyaviy tarzda berish amaliyoti tugatiladi, ular qaror qabul qilish uchun majburiy ahamiyat kasb etadi;
• obektlarning zilzilabardoshligi bo‘yicha berilgan salbiy xulosa loyiha tashkilotining “Shaffof qurilish” milliy axborot tizimidagi reyting ballarini kamaytirishga asos bo‘ladi.

Eng muhim o‘zgarishlardan biriga ko‘ra, qurilishi boshlangan ko‘p kvartirali uy-joylarga qo‘shimcha qavat qo‘shish yoki balandligini oshirish maqsadida shaharsozlik hujjatlarini ishlab chiqish, tegishli arxitektura-shaharsozlik kengashlarida ko‘rib chiqish, ekspertizadan va qayta ro‘yxatdan o‘tkazish taqiqlanadi.

Shuningdek, Qurilish va uy-joy kommunal xo‘jaligi vazirligi tomonidan noqonuniy qurilmalarni buzdirish ishlari narxlari har bir yil uchun alohida belgilab borilishi ko‘zda tutilgan.

Ushbu chora-tadbirlar qurilish sohasida intizomni kuchaytirish, zilzila xavfi yuqori bo‘lgan hududlarda aholi xavfsizligini ta’minlash va noqonuniy qurilishlar bilan keskin kurashishga qaratilgan.