Poytaxtlik deputatlar prezident bergan taklifni rad etishdi: Toshkent ko‘chalarida tezlik limiti pasaytirilmaydi

Toshkent shahrining ayrim ko‘chalarida belgilangan tezlikni bor-yo‘g‘i 10 km/soatga pasaytirish — 60 km/soat qilib belgilash to‘g‘risida Toshkent shahar IIBB YHXB taklifi poytaxtlik deputatlar tomonidan rad etildi.

Albatta, Toshkent shahrida belgilangan tezlikni kamaytirish poytaxtlik YPX xodimlarining o‘zlaridan chiqqan g‘oya emas. Prezident Shavkat Mirziyoyevning shu yil fevral oyida Samarqand shahriga qilgan tashrifida davlatimiz rahbari tomonidan o‘rtada tashlangan taklif edi. (Jahongir Ortiqxo‘jayev boshchilik poytaxt kengashi deputatlari bundan bexabar bo‘lishgan, shekilli.)

«Yaqinda Toshkentda tezlik ko‘pi bilan 60 km/soatgacha belgilangani haqida qaror chiqadi», — degan edi o‘shanda Sh.Mirziyoyev.

Davlat rahbari Toshkent shahri va boshqa yirik shaharlarning markaziy ko‘chalarida tezlik limiti oqilona, ilmiy yondashuv asosida o‘rnatilishi kerakligini ta’kidlagan edi. Ko‘chalarda harakatlanish haydovchilar uchun ham, piyodalar uchun ham qulay bo‘lishi kerak, — degan edi Mirziyoyev.

Ma’lumki, aholi punktlarida odamlar o‘limi bilan bog‘liq yo‘l-transport hodisalarining aksariyat qismi belgilangan tezlikni oshirish natijasida kelib chiqadi.

Dunyoning ko‘plab shaharlarida tezlik 40-50 km/soat qilib belgilangan. Uzoqqa bormaylik. Yon qo‘shnimiz Qozog‘istonning eski poytaxti Almati shahri ko‘plab ko‘chalarida 60 km/soat, markaziy ko‘chalarda tezlik hattoki 40 km/soat qilib belgilangan.

«Almati shahrini 2025 yilgacha rivojlantirish dasturi»ga ko‘ra, shaharning magistral va mahalliy ko‘chalarida tezlikni 60 va 40 km soatdan 50 va 30 km/soatgacha tushirish ko‘zda tutilgan.

Rossiya poytaxti Moskva shahrida ham markaziy ko‘chalarda tezlik 50 km/soat qilib belgilanishi, ayrim ko‘chalarda 30 km/soat qilinishi belgilangan. Qayd etilishicha, Moskvada tezlik rejimi pasaytirilishi YTHlar soni ikki barobarga kamayishiga olib kelgan.

Qozog‘istonda ikkinchi marta shahar ko‘chalarida tezlikni pasaytirishga hozirlanishmoqda. Bizda esa hali prezident topshirig‘i bo‘lgan birinchi taklifning o‘ziyoq deputatlar tomonidan rad etilmoqda.

Rad etilgan taklif Xalq deputatlari Toshkent shahar Kengashining Sanoat, transport, qurilish, kommunal soha va aholiga xizmat ko‘rsatish masalalari bo‘yicha doimiy komissiyasi Toshkent shahar IIBB YHXB tomonidan kiritilgan hisobot yuzasidan doimiy komissiya muhokamasida chuqur o‘rganib, xalq deputatlari Toshkent shahar Kengashining navbatdagi sessiyasi muhokamasiga kiritish belgilandi.

Shu yil aprel oyida hukumat qarori bilan tasdiqlangan yangi yo‘l harakati qoidalariga ko‘ra, aholi punktlarida transport vositalari tezligini soatiga 70 kilometrdan, maktab va maktabgacha ta’lim tashkilotlari atrofidagi yo‘llarda 300 metrgacha bo‘lgan masofada 30 kilometrdan, turar joy dahalari va yondosh hududlarda (uy-joy binolari orasidagi yer uchastkasida) esa soatiga 20 kilometrdan oshirmasdan harakatlanishga ruxsat etiladi.

Shahar ko‘chalari eng avvalo piyodalarning xavfsiz va bemalol harakatlanishlari uchun mo‘ljallangan bo‘lishi kerak, degan qoida O‘zbekistonda yaxshi ishlamayapti.

Qolaversa, bu hol deputatlarimiz tomonidan piyodalar manfaatini oyog‘osti qilib, haydovchilarga qulaylik yaratish borasida bosilgan birinchi qadam emas. Avval ham yo‘llarda to‘xtash va to‘xtab turish qoidalarini buzgan haydovchilarga belgilangan jarimalar miqdori parlament deputatlari tomonidan kamaytirilgan edi.

Chunki deputatlarimizning birortasi piyoda yurishmaydi. Shu sababli eng avvalo o‘zining komfortini o‘ylashadi, degan taxminga bemalol berish mumkin.

Davlat statistika qo‘mitasi ma’lumotlariga ko‘ra, 2022 yil 1 yanvar holatiga respublikada jismoniy shaxslarga tegishli jami avtomobillar soni 3 268 470 tani tashkil etmoqda. Hududlar kesimida jismoniy shaxslarga tegishli yengil avtomobillar soni bo‘yicha Toshkent shahri yetakchilik qilyapti – 525 028 ta. Ya’ni respublika bo‘yicha qariyb har 11 kishining 1 nafarida, Toshkent shahrida esa har bir oilada o‘rtacha 1 ta avtomobil bor.

Eslatib o‘tamiz, «2018–2022 yillarda O‘zbekiston Respublikasida Yo‘l harakati xavfsizligini ta’minlash konsepsiyasi»da shaharlar va aholi punktlarida transport harakatining maksimal ruxsat etilgan tezligini 60 km/soatgacha tushirish ko‘zda tutilgandi, ammo yakunda bu taklif ma’qullanmagan.

2020 yil bahorida ham «Yuksalish» umummilliy harakati O‘zbekiston shaharlari va aholi punktlarida transport harakatining ruxsat berilgan eng yuqori tezligini 70 dan 60 km/soatgacha pasaytirish taklifi bilan chiqqandi.

Shuhrat Shokirjonov, jurnalist