Tez tibbiy yordam dispetcherlik xizmati boshqa shoshilinch xizmatlar bilan bog‘lanadi

Vazirlar Mahkamasining 19.07.2017 yildagi 526-son qarori bilan Respublika shoshilinch tibbiy yordam ilmiy markazi va uning hududiy filiallarining Muvofiqlashtiruvchi-dispetcherlik xizmatlari faoliyatini tashkil etish chora-tadbirlari dasturi tasdiqlandi. Bu haqda Norma.uz xabar bermoqda

Eslatib o‘tamiz, Prezidentning 16.03.2017 yildagi PF-4985-son farmoniga binoan muvofiqlashtiruvchi-dispetcherlik xizmatlari 1.01.2019 yildan faoliyat ko‘rsatishni boshlaydi.

Ularning asosiy vazifalari quyidagilardan iborat:

•  tez tibbiy yordamning tezkorligi, sifati va undan foydalanish darajasini oshirish;
•  respublikaning barcha hududi bo‘yicha tez tibbiy yordam chaqiriqlarini qabul qilish va avtomatlashtirilgan tarzda qayta ishlash;
•  tez tibbiy yordam xizmati sayyor brigadalari faoliyatini tezkor boshqarish va muvofiqlashtirish;
•  IIV, FVV va «O‘ztransgaz» AJning tezkor xizmatlari bilan o‘zaro hamkorlikni ta'minlash;
•  tez tibbiy yordam xizmati faoliyatida tezkor statistik axborot va hisobotlarni shakllantirish.

Kelasi yilning oxirigacha muvofiqlashtiruvchi-dispetcherlik xizmatlarining tashkil etilayotgan Milliy geografik axborot tizimiga ulanishi ta'minlanishi darkor.

Chora-tadbirlar dasturiga asosiy uch yo‘nalish bo‘yicha quyidagi chora-tadbirlar kiritilgan:

•  muvofiqlashtiruvchi-dispetcherlik xizmatlari faoliyatini tashkil etish bo‘yicha normativ bazani shakllantirish;
•  moddiy-texnika bazasini shakllantirish;
•  xodimlarni tayyorlash va qayta tayyorlash bo‘yicha chora-tadbirlar.

Dasturni amalga oshirish uchun davlat maqsadli jamg‘armalaridan 15 mlrd. so‘m va xalqaro tashkilotlar, moliya institutlari va grantlari hisobidan 17 mln. AQSh dollari ajratiladi.