АҚШ Марказий разведка бошқармаси раҳбари Майк Помпео маълум қилдики, бир неча ҳафта илгари Сурияда «бир неча юз россиялик ўлдирилган». Унинг сўзлари AFP томонидан келтирилган.
Бу ҳақда у ўз номзоди Давлат департаменти раҳбарлиги учун илгари сурилган Сенат йиғилишида баён қилган.
«Бир неча ҳафта илгари Сурияда россияликлар муносиб рақибга дуч келишди ва улардан бир неча юз киши ҳалок бўлди», — деган Помпео.
Помпео қайси воқеа ҳақида гапираётганига аниқлик киритмаган. Кўп эҳтимол билан у февраль ойида Сурияда америкаликларнинг авиазарбаси оқибатида ҳалок бўлган россиялик ёлланма аскарларни назарда тутган.
7-8 февраль кунларида Дейр-аз-Зорда Сурия ҳукумати тарафида урушаётган кучлар АҚШ бошчилигидаги коалиция томонидан артиллерия ва авиация томонидан ҳужумга учраганди. Ўшанда россиялик олигарх Евгения Пригожин томонидан молиялаштирилиши айтиладиган «Вагнер гуруҳи», ИШИД овчилари гуруҳи, шунингдек, бошқа ироқлик, эронлик ва афғонистонлик ёлланма ҳарбийлар курдлар назоратидаги «Коноко» нефть майдонларига ҳужум уюштирган ва коалиция кучлари томонидан қарши олинганди. Натижада, ҳужум қилганларнинг йўқотишлари 200 нафаргача бўлгани айтилганди. Bloomberg хабарига кўра, ҳалок бўлган ёлланма ҳарбийларнинг 100 нафари россиялик бўлган.
Россия ТИВ бу маълумотларни «классик дезинформация» деб атаганди.
Эслатиб ўтамиз, 13 март куни АҚШ президенти Дональд Трамп Рекс Тиллерсонни Давлат котиби лавозимидан четлатди ва унинг ўрнига МРБ раҳбари Майк Помпео номзодини тавсия қилди.
