Кениянинг ўнлаб шаҳарларида юз минглаб намойишчилар кўчаларга чиқди. Улар солиқларни ошириш бўйича янги қонунга қарши чиқмоқда. Полиция ўт очди, натижада бир неча киши ҳалок бўлди, яна ўнлаб одамлар яраланди.
Кенияда баҳсли солиқ ислоҳотларига қарши намойишлар авж олди. Тинч тарзда бошланган намойишлар 25 июн, сешанба куни зўравонликка айланди: тушдан кейин юзлаб намойишчилар пойтахт Найробидаги парламент биносига бостириб киришди. Намойишчилар тўсиқларни бузиб, бир неча жойда бинога ўт қўйди, мебелларни вайрон қилди. Маҳаллий матбуотнинг ёзишича, парламент аъзолари ертўладаги ўтиш жойлари орқали қочишга мажбур бўлган.
Daily Nation газетасига кўра, полиция намойишчиларга қарши кўздан ёш оқизувчи газ ва сув пуркагичлардан фойдаланган, шунингдек, намойишчиларга қарата ўт очган. Биргина пойтахтнинг ўзида, дастлабки маълумотларга кўра, беш киши ҳалок бўлган, яна ўнлаб кишилар яраланган. Таъкидланишича, қурбонлар ҳақида ҳозирча расмий маълумот йўқ, шунинг учун уларнинг сони ортиши мумкин.
Кениянинг турли шаҳарларида ҳукумат биноларига ўт қўйилди
Кечқурун Найробидаги минтақавий ҳукумат биноси ҳам ёқиб юборилган ва қисман талон-торож қилинган. Мамлакатнинг бошқа ҳудудларидан ҳукумат бинолари, депутатлар идоралари ва транспорт воситалари талон-торож қилингани ва ўт қўйилгани, тинч намойишлар ўтказилгани ҳақида хабарлар келиб тушди. Сешанба куни учинчи ўқишда қабул қилинган янги солиқ қонунига қарши норозилик учун Шарқий Африка мамлакатининг 30 дан ортиқ шаҳрида юз минглаб одамлар кўчаларга чиқди. Депутатларнинг учдан икки қисми уни ёқлаб овоз берди ва энди ҳужжат мамлакат президенти Уилям Рутога имзолаш учун тақдим этилади.
Қонунда давлат ғазнасини тўлдириш мақсадида амалдаги солиқларни кўпайтириш ва янгиларини жорий этиш кўзда тутилган. Кўпгина танқидчилар, жумладан, бизнес вакиллари ва черков раҳбарлари, бу нархларнинг назоратсиз ўсишига олиб келиши ва сотиб олиш қобилияти пасайиши шароитида корхоналар сезиларли йўқотишларга учрашидан хавотирда.
Ўтган ҳафта бошланган норозилик намойишлари чоғида аксар ёшлардан иборат намойишчилар Кениядаги коррупцияга қарши чиқишмоқда ва давлат раҳбари Рутонинг истеъфога чиқиши ва функционал давлат бошқаруви яратилишини талаб қилмоқда.
Ғарбнинг 13 давлати Кениядаги вазиятдан хавотир билдирди. Қўшма баёнот эълон қилган давлатлар қаторида Британия, Германия, Канада ва АҚШ ҳам бор.
