4 та давлат – АҚШ, Буюк Британия, Франция ва Украина вакиллари БМТ Хавфсизлик кенгашининг Сурия бўйича йиғилишида Суриянинг БМТдаги элчиси Башар Жаъфарий ўз нутқини бошлаганда залдан намойишкорона чиқиб кетишди, деб хабар бермоқда ТАСС ахборот агентлиги. Жаъфарий халқаро террорчиликка қарши курашда ғарб давлатлари томонидан иккиёқламалик қилинаётгани ҳамда Москва ва Дамашқни ёмонотлиқ қилишга уриниш ҳақида гапирган.
"Ғарб давлатлари тўтиқушларга ўхшайди, улар Сурияда ҳукумат армияси россиялик иттифоқдошлари кўмагида ўтказаётган операциялар ҳақида ёлғонни бетўхтов такрорлашмоқда. Улар маълумот манбалари сифатида улардан боғлиқ бўлган бир пайтда, қандай қилиб террорчиларга қарши кураша олади? Бу давлат ҳукуматлари террорчилар билан боғланган", деб айтди Жаъфарий.
Бундан ташқари, Жаъфарий БМТ Хавфсизлик кенгашининг қолган аъзолари эътиборини Мўсулни жангарилардан озод қилиш операциясида нимагадир халқаро кўмакдан фойдаланилаётганига қаратди ва нима учун Сурия ҳукумати Ҳалабни террорчилардан озод қилиш учун худди шундай ҳуқуққа эга эмаслигидан ҳайрат билдирди.
Россиянинг БМТдаги доимий вакили Виталий Чуркин зални тарк этган ҳамкасбларининг хатти-ҳаракатини ўринсиз деб атаб, улар мунтазам равишда бундай қилиб келишларини қўшимча қилди.
