Тошкент вилояти божхона бошқармаси “Ғишткўприк” божхона комплекси ходимлари ана шундай шахслардан бири, қўшни давлатдан кириб келган фуқаро К.Қодирқулованинг қинғир қилмишларини фош қилишди, деб хабар бермоқда Тошкент вилояти божхона бошқармаси ахборот хизмати
Унга тегишли қўл юклари назорат-рентген аппрати орқали кўздан кечирилганда, экрандаги тасвирларнинг шубҳали тус олиши божхоначиларни ушбу юкларни янада синчковлик билан кўздан кечиришга ундади.
Натижада, ушбу аёл томонидан божхоначиларнинг кўзини шамғалат қилиш мақсадида қўл юклари ичиидаги тўқиш учун мўлжалланган ип калавалардан бирининг орасига 3000 АҚШ доллари миқдоридаги нақд хорижий валюта устомонлик билан яширилганлиги аниқланди.
Калавалардан яна бирининг орасига эса 92 гр.дан ортиқ тилла тақинчоқлар яширилган экан. Ноқонуний равишда олиб ўтишга уринилган мазкур 49 дона заргарлик буюмларининг умумий қиймати дастлабки маълумотларга кўра салкам 12 млн. сўмни ташкил қилмоқда.
Қонунбузар аёл шу билан кифояланмаган. Ушбу аёл божхона ходимларининг оғзаки сўрови пайтида ва йўловчи божхона декларациясида маълум қилмасдан туриб, автотранспорт воситалари учун мўлжалланган 3 дона антирадар, 2 дона уяли алоқа воситаси ва 1 дона DVD плейерини ҳам ноқонуний равишда олиб киришга уринган экан.
Шу тариқа фуқаро К.Қодирқулованинг қиймати тахминан 25 млн. сўмдан ортиқ бўлган товар-моддий бойликларни ноқонуний равишда олиб кириш режаси чиппакка чиқарилди.
Ҳозирда мазкур ҳолат юзасидан божхона текширувлари ва суриштирув жараёнлари давом эттирилмоқда.
Маълумот учун, амалдаги тартибларга мувофиқ, Ўзбекистон Республикаси ҳудудига жисмоний шахслар томонидан товарларни акциз солиғи солинмасдан олиб киришнинг рухсат этилган меъёрларига мувофиқ умумий оғирлиги 30 граммдан ортиқ бўлмаган 5 донагача заргарлик буюмларини олиб киришга рухсат этилади.
