Буюк британиялик саккиз ёшли Мэйзи Култон ноёб генетик касаллик - Тричер Коллинз синдромидан азият чекади. Бу касаллик бош суяк-юз шаклининг ўзгариши билан ажралиб туради ҳамда 50 минг чақалоқдан бир нафарида учрайди.
Мэйзининг онаси Сара қизини илк бора кўрганда, унда муаммолар бор эканини тушунган – қизчада қулоқлари бўлмаган, юз шакли эса ўзгарган эди. Бундан ташқари, Мэйзи нафас ололмаган – туғруқдан сўнг шифокорлар унга махсус трубка ўрнатишди ва жонлантириш бўлимига ётқизишди.
Мэйзи мураккаб туғма касаллик туфайли юзида 29 та жарроҳлик амалиётини ўтказди: унинг жағлари, лунжлари ва ҳаттоки кўзларини тўғирлашган.
Қизча бошидан ўтказган барча синовларга қарамай, ҳаётдан қувониб яшайди. Мэйзи ташқи қиёфасига эътибор қаратган кишиларга касаллиги ҳақида батафсил сўзлаб беради. Бироқ, доимий эътибор унинг ғашига ҳам тегади.
"Мэйзи ўзига тикилиб қарайдиган кишилардан чарчайди. Уни шундай қабул қилувчи кишилар билан мулоқот қилишни ёқтиради" – дейди унинг онаси Сара Култон.
