Ўзбекистон Республикаси Вазирлар Маҳкамасининг куни-кеча қабул қилинган қарорига мувофиқ, Тошкент тиббиёт академиясининг Термиз филиали ташкил этилди, деб хабар бермоқда Соғлиқни сақлаш вазирлиги ахборот хизмати.
Айтиш жоизки, бугунги кунда ҳудудларда тиббий кадрлар етишмовчилиги билан боғлиқ муаммолар тиббий хизмат сифатига сезиларли таъсир кўрсатмоқда. Хусусан, Сурхондарё вилоятидаги даволаш-профилактика муассасаларида ҳам 2000 нафарга яқин шифокорга эҳтиёж бор. Айниқса, вилоятдаги ҚВПлар ва қишлоқ оилавий поликлиникаларини умумий амалиёт шифокорлари билан таъминлаш даражаси 50 фоизга ҳам етмайди.
Президент Шавкат Мирзиёев тиббиёт ходимлари билан учрашувларда, жумладан, жорий йил 19-20 январь кунлари Сурхондарё вилоятига ташрифи доирасида вилоят фаоллари билан учрашиб, бошқа соҳалар билан бир қаторда соғлиқни сақлаш тизимида мавжуд бундай муаммоларни бартараф этиш, кадрларга бўлган эҳтиёжни таъминлаш бўйича тегишли топшириқлар берган эди. Тошкент тиббиёт академиясининг Термиз филиали ташкил этилиши бу муаммо ечими йўлида муҳим қадам бўлди.
Олий ўқув юртларига ўқишга қабул қилиш бўйича Давлат қабул комиссиясининг 2018 йил 23 январдаги 12-сонли баённомаси асосида Тошкент тиббиёт академиясининг Термиз филиалига жорий ўқув йили учун 300 нафар сурхондарёлик ёшлар туманлар кесимидаги шифокорларга бўлган эҳтиёжларни қоплаш мақсадида ажратилган квоталар асосида қабул қилинди. Қувонарлиси шундаки, ушбу талабалар бугунги кунда аниқ мақсади ва иш жойига эга. Чунки, ҳар бир талаба вилоят хокимлиги билан келишган ҳолда қишлоқ оилавий поликлиникалари, қишлоқ врачлик пунктларида ишлаш учун шартнома имзолаган.
Таъкидлаш лозимки, Тошкент тиббиёт академиясининг Термиз филиали энг сўнгги замонавий ахборот-коммуникация технологиялари, тиббиётга оид барча асбоб-ускуналар — фантом ва муляжлар, лаборатория анжомлари билан жиҳозланган. Олий таълим даргоҳида тиббиётга оид адабиётлар билан тўлиқ таъминланган ахборот ресурс маркази, турар жой ва ётоқхоналар, жисмоний тарбия ва спорт билан шуғулланиш учун замонавий ёпиқ спорт иншоотлари барпо этилган.
— Халқимизга жаҳон андозалари даражасида замонавий тиббий ёрдамни ташкил этишда малакали мутахассисларнинг ўрни ниҳоятда муҳим, — дейди Соғлиқни сақлаш вазирлиги бош бошқарма бошлиғи Ўктам Исмаилов. — Айниқса, тиббиётнинг бирламчи тузилмаларида малакали шифокорларнинг фаолият юритиши касалликларнинг олдини олиш, барвақт аниқлаш ва халқимизнинг соғлиғини муҳофазалашда муҳим аҳамият касб этади. Тошкент тиббиёт академияси Термиз филиалининг очилиши бу борада муҳим қадам бўлди. Янги тиббий олий ўқув юртида талабаларнинг пухта билим олишлари учун моддий-техник база билан бир қаторда, малакали педагогларнинг фаолияти муҳим ўрин тутади. Шуни эътиборга олган ҳолда янги тиббий олий таълим муассасасига Тошкент тиббиёт академиясининг тажрибали профессор-ўқитувчилари ҳам жалб қилинди. Шунингдек, масофадан туриб, Тошкент тиббиёт академиясининг аудиторияларида олиб бориладиган маърузалар ва дарсларни тўғридан- тўғри талабаларга намойиш этиш имконияти яратилди.
Юқорида қайд этилган қарорга мувофиқ, Сурхондарё вилоятида доимий яшайдиган, ҳозирги пайтда республиканинг олий тиббиёт таълим муассасаларида ўқитишнинг тўлов-контракт шаклида таълим олаётган 4 – 5-босқич талабалари ҳам ўз хоҳишларига кўра, филиалга давлат гранти бўйича ўқишга қабул қилинади. Мазкур тиббий олий ўқув юртини битирган барча талабалар келгусида Сурхондарё вилоятидаги шифокорлар етишмаётган тиббиёт муассасаларида ўн йил ишлаб беришлари мажбурий этиб белгиланган.
