Қорақалпоғистонлик Бийбиназ Жолдасбаева Лондонда таҳсил олади. Kruz нашри у билан ижтимоий тармоқлар орқали боғланди ҳамда ёш талаба билан суҳбат уюштирди.
- Лондонда ўқишга киришингиз тарихи ҳақида айтиб ўтсангиз
- 2011 йил Тошкент Давлат Юридик Университетига ўқишга грант асосида қабул қилинганман. Ўқиш пайтида IELTS сертификатини олиш мақсадида, индивидуал дарсларга борганман ва Буюк Британияга бориб магистр дипломини олишни орзу қилганман. 2015 йил Тошкент Давлат Юридик Университетини тугатиб, Тошкентда адвокатлик фирмасида, кейинроқ «Асклепий» фармацевт компаниясида юрист бўлиб ишлаганман. Мен учун магистратурада ўқиш учун иш тажрибам кўп бўлиши зарур эди, чунки чет эл давлатларида магистратурада кўп йиллик тажрибага эга талабалар ўқиши ҳақида кўп ўқиб, эшитганман.
2017 йили май ойида IELTS топшириб, Law университетларни қидиришни бошладим. Мен учун Лондонда ўқиш болаликдаги орзум бўлгани учун, BPP Law University ҳамда The University of Law’га ҳужжатларимни топширганман. Икки университет ҳам қабул қилгач, мен BPP университетини танлашга қарор қилганман, чунки LLM International Business Law факультети кўпроқ қизиқтирган эди.
- У ерни битиргандан кейин қандай режалар бор?
- Магистр дипломини олгач, Ўзбекистонга қайтиб, халқаро ташкилотларнинг бирида юрист бўлиб ишлаш мақсадим бор. Ҳозирда ўқиш пайтида, Лондон шаҳрининг Sterling Lawyers юридик фирмасида амалиёт ўтаяпман. Кўпроқ халқаро амалиётини ўрганиб, Ўзбекистонда шу олаётган билимларимни қўллаш ниятим бор.
