Фото: AP
АҚШ президенти Дональд Трамп шахсий мобил телефонидан кўп фойдалана бошлади, шу сабабдан Оқ уй аппарати ходимларида турли хавотирлар келиб чиқмоқда. Бу ҳақда CNN телеканали ўз манбаларига асосан хабар берган.
«Сўнгги вақтларда у телефонидан жуда кўп фойдалана бошлади», - дея маълум қилган манбалардан бири.
Телеканал маълумотларига кўра, Трамп ўз қўнғироқлари ҳақидаги батафсил маълумот аппарат раҳбари Жон Келлига тақдим этилмаслигини хоҳламоқда. Аввал у қўнғироқлар учун ички телефондан фойдаланган, бироқ энди кўпроқ ўз телефонини ишлатмоқда.
Эслатиб ўтамиз, аввалроқ АҚШ президенти Дональд Трамп Франция етакчиси Эммануэль Макрон билан биргаликда Оқ уйдан унча узоқ бўлмаган ерда эман дарахти кўчатини ўтқазгани хабар берилганди.
