Америкалик сенаторлар Шелдон Уайтхаус ва Жинн Шахин жаҳондаги энг йирик банклардан россиялик олигархлар билан алоқалари тўғрисидаги маълумотни очиқлашни талаб қилди. Бу ҳақда Reuters хабар бермоқда.
Маълум бўлишича, сенаторларнинг тегишли хати АҚШдаги учта банк: Bank of America Corp, JPMorgan Chase ва Citibank’га, шунингдек Европадаги Barclays, Deutsche Bank, UBS, HSBC ҳамда Credit Suisse’га юборилган.
«Россиядаги кўплаб олигархлар уларнинг бойлиги ва ўз давлатига бўлган муносабати эътиборга олинса, сиёсий таъсирга эга, ёки бунга қодирдир», - дейилади сенаторларнинг мактубида.
Аниқлик киритилишича, банклар беш йил давомида «Кремль рўйхатидан» бўлган исталган шахснинг назоратидаги ҳисоблар борлигини текширувдан ўтказгани бўйича хабар бериши лозим.
Эслатиб ўтамиз, аввалроқ Россия президенти матбуот котиби Дмитрий Песков Россияда олигархлар йўқлиги ҳақида маълум қилганди.
