Kreml: Rossiyada oligarxlar yo‘q

Rossiya prezidenti matbuot kotibi Dmitriy Peskovning ma'lum qilishicha, Moskva Rossiyadan bo‘lgan tadbirkorlarning AQShdagi sanksiya ro‘yxatlariga kiritilishi bo‘yicha rasmiy tasdiqlov olmadi. Bu haqda RIA «Novosti» xabar bermoqda.

«Siz tilga olgan barcha yangiliklar haqiqatdan ham OAVda kecha va bugun keng tarqaldi, jumladan, birinchi navbatda anglosakson OAVda. Biroq bu borada biz qandaydir rasmiy tasdiqlov yoki rasmiy bayonotni ko‘rmadik. Sizlar bilasizlarki, vaziyat haqiqatdan ham oddiy emas, u juda keskin va shuning uchun, albatta, biz OAV xabarlariga qarab ish ko‘ra olmaymiz», - deya aytib o‘tgan Peskov.

Shuningdek, uning qo‘shimcha qilishicha, Rossiyada oligarxlar yo‘qdir.

«Rossiyalik oligarxlar» iborasini qabul qilib bo‘lmas deb hisoblaymiz. Rossiyada oligarxlar bo‘lgan vaqt ancha orqada qolgan, Rossiyada oligarxlar yo‘q», - deya ta'kidlab o‘tdi Peskov.

Eslatib o‘tamiz, avvalroq AQShda rossiyalik oligarxlar so‘roq qilingani xabar berilgandi.