Молдавия давлат қўриқлаш хизмати республика президенти Игор Додоннинг кортежи йўл-транспорт ҳодисасига учраши видеосини эълон қилди.
Видеода қарама-қарши йўналишдан келаётган юк машинаси Додон кортежи келаётган полосага чиқиб кетиб, унинг машинасига урилгани ва уни йўл четига чиқариб юборганини кўриш мумкин.
Додон кортежи Страшени-Калараш йўлида ЙТҲга учраган. Маълум қилинишича, воқеа оқибатида 3 киши енгил ва ўрта оғирликдаги жароҳат олган. Додоннинг ўзига ҳеч нарса қилмаган, унга тиббий ёрдам талаб этилмаган.
Додоннинг маъмуриятида маълум қилинишича, ЙТҲ оқибатида президентнинг оиласидан ҳеч ким жабрланмаган.
“ОАВда Игор Додоннинг онаси ЙТҲда жиддий жабрлангани ҳақида маълумот пайдо бўлганди. Бу маълумот ҳақиқатга тўғри келмайди”, деб маълум қилинган хабарда.
