Венгрия ташқи ишлар вазири Петер Сийяртонинг фикрича, Европа Иттифоқининг Венгрияга Россия билан жуда яқин алоқаларга эгалиги юзасидан билдираётган айбловлари асоссиздир. Сийярто бу ҳақда Der Standard нашрига берган интервьюсида айтиб ўтди.
Унинг айтишича, Европа Иттифоқи Россия билан яқин алоқаларни қўллаб-қувватлайди, бироқ буни сир тутади. У бу сўзларининг исботи сифатида Австрия канцлери Себастьян Курцнинг Владимир Путин билан тез-тез учрашиб туришини келтирди. Икки раҳбар жорий йилда 4 марта учрашишга улгуришган.
Бундан ташқари, Сийярто Россия ва Франция президентлари орасида кўплаб телефон қўнғироқлари бўлиб туришини ҳамда Эммануэл Макроннинг Санкт-Петербургдаги иқтисодий форумга ташрифини таъкидлаб ўтган. Сийяртонинг айтишича, Москвада энергетика соҳасидаги музокараларда Путин билан бир столда ғарбнинг энг йирик 4 энергетик концерни раҳбарлари ўтирганини кўрганда жуда ҳайратланган.
“Шу сабабли Венгрияни бундай тарзда кўрсатишларидан чарчадим. Гап шундаки, ғарбий европаликлар Россия билан биздан яқинроқ алоқага эга. Фарқ шундаки, улар ташқи томондан тортишувлар остида катта бизнес олиб боришаётганини яширишга ҳаракат қилишади”, деб айтган венгриялик вазир.
Сийярто Европа Иттифоқи нотўғри йўналишдан кетаётганини айтган. Унинг фикрича, Еврокомиссия тубдан ўзгартирилиши лозим, чунки ҳозирги таркибида “аянчли натижалар”ни кўрсатмоқда.
“2019 йилда Европа Иттифоқига аъзо давлатлар сони илк бор камаяди, аввал барқарор бўлган трансатланик муносабатлар жуда мўртлашиб қолди. Ўтган 3 йил ичида ЕИда 33 та теракт содир этилди, улар оқибатида 300 дан кўпроқ одам ҳалок бўлди. Буларнинг барчаси жорий комиссия муваффақиятсизликка учраганидан дарак беради,”, деб айтган Сийярто.
