Ироқлик депутат Ҳасан Салимнинг айтишича, ИШИД етакчиси Абу Бакр ал-Бағдодий Ироқнинг Анбар вилоятидаги чўлда америкалик ҳарбийлар ҳимояси остида эркин ҳаракатланмоқда.
Депутатнинг таъкидлашича, ал-Бағдодий Ироқ ва Сурия ўртасида ҳаракатланмоқда. Унга ҳимоя америкалик ҳарбийлар жойлашган Айн ал-Асад ҳарбий базасидан тақдим қилинмоқда.
Депутатнинг фикрича, америкалик ҳарбийлар ИШИД етакчисини “Ироқдан хорижий қўшинларни чиқариб юборувчи қонун лойиҳаси маъқулланишидан қўрқув” сабаб қўллаб-қувватлашмоқда.
Хавфсизлик бўйича курд эксперти Хавкар ал-Жафнинг Baghdad Today ахборот агентлигига маълум қилишича, ал-Бағдодий ҳозирда Сурияда бўлмай, Сарсар кўли ва она шаҳри Самарра ўртасидаги ҳудудда қолмоқда. У Ироқда бўлганда ўз хавфсизлигини таъминлаш мақсадида маҳаллий қабилалар билан алоқаларидан фойдаланмоқда.
Ироқ парламентидаги энг йирик блок “Ал-Фатҳ” вакили Ахмад ал-Асадийнинг маълум қилишича, АҚШ қўшинларининг Ироқдан олиб чиқилиши ҳақидаги қонун март бошига белгиланган сессияда биринчилардан бўлиб овозга қўйилади.
Парламент спикери биринчи ўринбосари Ҳасан ал-Каъабий февраль бошида Ироқ парламенти АҚШ билан хавфсизлик ҳақидаги келишувни бекор қилиш ҳақидаги қонунни ишлаб чиқмоқчилигини маълум қилганди. Бу эса америкалик ва бошқа хорижий ҳарбийларнинг Ироқдан олиб чиқилишига олиб келади.
