Кўп миқдорда газланган ва ширин ичимликлар ичиш юрак ва қон-томир касалликлари ҳамда саратондан эрта ўлиш эҳтимолини сезиларли равишда оширади. Бу ҳақда Circulation журналида маълум қилинди.
"Кузатувларимиз сайёранинг барча аҳолиси умрни узайтириш ва саломатликни яхшилаш учун ҳамма турдаги ширин ичимликлардан воз кечиб, оддий сувга ўтишлари кераклигини яна бир исботлади", — дейди Гарвард университети олими Васанти Малик.
Малик ва унинг ҳамкасблари 1980-2014 йиллар оралиғида ўтказилган тадқиқот натижаларидан келиб чиқиб юрак ва қон-томир касалликлари келиб чиқиши ҳамда улар сабабли ўлим ҳолатлари юз беришининг асосий сабабларидан бири кўп миқдорда ширин ичимликлар ичиш эканлигини тасдиқлашди.
Тадқиқотларда юз мингдан ортиқ малакали тиббиёт мутахассислари иштирок этишган.
Маълум бўлишича, ҳафтасига уч-тўрт стакан газланган ичимлик ичувчи кишилар орасида ўлим ҳолати бу ичимликларни умуман истеъмол қилмайдиганларга нисбатан 6%га кўпроқ кузатилган. Бундай ичимликларни ҳар куни кунига бир стакан истеъмол қилиш эрта ўлим ҳолатини 14%га ҳамда икки ва ундан ортиқ стакан истеъмол қилиш 21%га ошириши аниқланган.
