Шимолий Корея раиси Ким Чен Ин Россия президенти Владимир Путин таклифи билан апрелнинг иккинчи ярмида Россияга ташриф буюради. Бу ҳақда Кремль матбуот хизмати маълум қилди. Бу учрашув икки давлат етакчисининг илк учрашуви бўлади.
15 апрелда Жанубий Кореянинг Yonhap ахборот агентлиги учрашув Путин 24 апрелда борадиган Узоқ Шарқда бўлиб ўтиши мумкинлигини маълум қилган.
Агентликнинг ёзишича, Путин 26-27 апрель кунлари Пекиндаги “Бир камар, бир йўл” халқаро форумида иштирок этади, Ким Чен Ин билан учрашув эса ушбу тадбиргача ёки ундан кейин бўлиб ўтади.
18 апрелда Россия президенти матбуот котиби Дмитрий Песков Путин ва Ким Чен Ин ўртасидаги учрашув жойи, вақти ва бошқа тафсилотлари ҳақида аниқ маълумот йўқлигини маълум қилган ва “учрашув тайёргарлик босқичида эканлигини” таъкидлаб ўтган.
Япониянинг Kyodo News агентлиги Россия ҳукуматидаги манбага иқтибос келтирган ҳолда Ким Чен Ин маъмурияти бошлиғи Ким Чхан Сон Владивостокда бўлгани ва Россия Шимолий Корея етакчисини 24-25 апрель кунлари кутишга тайёрланаётганини маълум қилган.
Шунингдек, “Известия” нашри 17 апрелда икки давлат етакчисининг учрашуви Путиннинг Пекинга кетишидан олдин Владивостокда бўлиб ўтиши мумкинлиги ҳақида хабар берган.
