Шимолий Корея етакчиси Ким Чен Иннинг синглиси Ким Ё Чен омма олдида кўриниш бериб, Ханойда ўтган АҚШ-Шимолий Корея саммитидаги муваффақиятсизлик учун бошқа мансабдор шахслар билан бирга жазолангани ҳақидаги гапларни йўққа чиқарди.
Ким Ё Чен акаси ва бошқа мансабдор шахслар билан бирга 3 июнда Пхеньяндаги “Биринчи май” стадионида гимнастлар ва артистларнинг чиқишларини томоша қилган.
Ўз навбатида Жанубий Кореянинг “Рёнхап” ахборот агентлигининг хабар беришича, Шимолий Корея етакчиси синглисининг исми Шимолий Корея ОАВда охирги марта 1 апрель куни тилга олинганди. Ўшанда Ким Ё Чен олий халқ йиғини йиғилишида иштирок этган.
Ким Ё Чен, шунингдек, Россия ва Шимолий Корея етакчиларининг Владивостокдаги саммитида кўринмаган, ваҳоланки у акасининг хорижий сафарларда унга мунтазам равишда ҳамроҳлик қилган.
3 июнда Корея марказий телеграф агентлиги 3 июндаги тадбирда Шимолий Корея етакчисининг биринчи ўринбосари Ким Ен Чхоль ҳам пайдо бўлганини маълум қилган. Ваҳоланки, ўтган ҳафта Жанубий Кореянинг Chosun Ilbo нашри номини маълум қилмаган манбага таяниб Ким Ен Чхоль Ханойдаги муваффақиятсиз саммитдан кейин сургун қилинганини маълум қилган. Шунингдек, Шимолий Корея ташқи ишлар вазирлигининг саммитда иштирок этган 5 амалдори, жумладан АҚШ ишлари бўйича махсус вакил Ким Хек Чхол қатл этилгани хабар қилинган.
Февраль охирида Вьетнам пойтахти Ханойда Шимолий Корея ва АҚШ ўртасидаги иккинчи саммит бўлиб ўтган. Бироқ у муддатдан аввал ҳеч қандай келишувларсиз якунланган. Бунга эса Шимолий Кореяга қарши санкциялар сабаб бўлган. Трамп саммитдан кейин Шимолий Корея санкцияларнинг тўлиқ бекор қилинишини талаб қилганини маълум қилган. Бу орада Шимолий Корея ташқи ишлар вазирлиги Пхеньян санкцияларнинг қисман бекор қилинишини сўраганини таъкидлаб ўтган.
