АҚШ маъмурияти Венесуэладан Кубага нефть етказиб берилишининг олдини олиш учун қўшимча чораларни кўриб чиқмоқда, деди Трампнинг миллий хавфсизлик бўйича маслаҳатчиси Жон Болтон.
"Рўйхатга Венесуэла ва Кубадаги шахсларни киритиш режаси бор. Венесуэладан Кубага нефть етказиб берилишининг олдини олиш учун кўпроқ чоралар қабул қилмоқчимиз. Ҳар сафар санкция киритганимизда Мадуро режими уларни четлаб ўтишга уринмоқда ва биз янги услублар орқали бунинг олдини олиш устида ишламоқдамиз", - деди Washington Free Beacon нашрига берган интервьюсида.
Унинг сўзларига кўра, Куба жаҳон бозоридагига нисбатан арзон нефть олгани учун Венесуэлага ҳарбий ёрдам кўрсатмоқда. Венесуэла халқи эса аксинча, кубаликлардан ҳеч қандай фойда кўрмаяпти, деди Болтон.
Июнь ойи бошида АҚШ Кубага қарши янги санкциялар киритганди. 5 июндан АҚШ фуқароларига Кубага таълим алмашуви бўйича оммавий сафарлар уюштириши, АҚШ йўловчи кемаларининг Куба портларига кириши тақиқланади.
