Жерар Депардье иштирокидаги ҳужжатли фильм Тошкент, Самарқанд, Бухоро, Хива, Термиз ва Нукусда суратга олинади.
Машҳур француз актёри ва Ўзбекистоннинг Франциядаги туризм элчиси Жерар Депардье Бухоро вилоятига келди. Бу ҳақда Бухоро вилояти Туризмни ривожлантириш департаменти ахборот хизмати хабар берди.
Француз телеканалларида видеороликлар тайёрлаш орқали сайёҳлик потенциалини ошириш ва Ўзбекистоннинг ижобий имижини тарғиб этишни мақсад қилган Ўзбекистон Туризмни ривожлантириш давлат қўмитаси “B-Tween” француз ишлаб чиқариш компанияси билан биргаликда “Paris Premiere” телеканали учун “Ипак йўли” ҳужжатли фильмини тайёрлаш режасини ишлаб чиққан эди. Мазкур фильмда француз актёри Жерар Депардье бош ролни ижро этиши кўзда тутилган бўлиб, Ўзбекистон ҳақидаги ҳужжатли фильм суратга олиш ишлари учун актёр Бухорога келди.
“Кўплаб экспертларнинг таъкидлашича, Ўзбекистон мусулмон дунёси учун инсонпарварлик ривожланиш моделининг пойдеворини қўймоқда. Айниқса, Ўзбекистон азалдан олимлар ва буюк мутафаккирларни дунёга келтирган замин эканлигини, «VIII асрдан бери бу ерда ноёб интеллектуал муҳит яратилган бўлиб бунда Нақшбандийнинг энг катта сўфийлик нишони ҳам муҳим аҳамият касб этади”, - деб таъкидлади у.
Шунингдек, актёр “Пойи Калон” мажмуасида ҳам бўлиб, айни маданий мерос объектининг тарихий жозибадорлиги гувоҳига айланди.
Шундан сўнг актёр “Old Bukhara” ресторанида Бухоронинг миллий “Софи Оши”ни тайёрлаш маҳорат дарсида ҳам иштирок этди.
Жерар Депардье иштирокида ҳужжатли фильмни суратга олиш ташкилотчилари сифатида «Ўзбеккино», Туризмни ривожлантириш давлат қўмитаси, Ўзбекистоннинг Франциядаги элчихонаси ташаббус кўрсатмоқда. Фильм Ўзбекистоннинг 5 та шаҳри - Тошкент, Самарқанд, Бухоро, Хива, Термиз ва Нукусда суратга олинади. Ўзбекистонда фильмни суратга олиш ишлари 26 ноябргача давом этиши режалаштирилган.
