2019 йил 28 декабрь куни Kun.uz сайтида «30 миллион тўлаб Латвияга кетган меҳнат муҳожирлари ватанга қайтиб келди» сарлавҳаси остида материал эълон қилинган эди.
Унда Самарқанд шаҳрида жойлашган «Amille Bahora» хусусий бандлик агентлиги томонидан 30 млн. сўм эвазига Латвияга юборилган икки ўзбекистонлик Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлигининг амалий кўмагида ватанга қайтишга муваффақ бўлгани баён этилган эди.
Мазкур материалга нисбатан «Amille Bahora» хусусий бандлик агентлиги муносабат билдириб, икки нафар фуқаронинг Ўзбекистонга қайтиб келиш авиачипталари агентлик томонидан сотиб олинганини маълум қилган.
Шунингдек, хусусий бандлик агентлиги ўз муносабатида фуқаролар билан юз бераётган зиддиятлар шартномавий муносабатлар юзасидан вужудга келган бўлиб, тарафлар имзолаган шартномага асосан тегишли тартибда суд орқали ҳал этилиши лозимлигини уқтирган.
