Туркиянинг Turkish Airlines авиакомпанияси август ойи учун парвозлар режасини эълон қилди.
Туркия авиакомпанияси коронавирус инфекцияси тарқалиши сабабли март ойида тўхтатилган халқаро рейсларни тикламоқда.
Turkish Airlines 1 августдан Ўзбекистон, Қирғизистон, Россия, Саудия Арабистони, Ҳиндистон, ЖАР ва БААга авиапарвозларни йўлга қўйишни режалаштирган.
«Сизларга саёҳат қилиш учун имкониятлар таклиф этишдан хурсандмиз, зеро бу даврда сафарларни режалаштириш нақадар қийинлигини биламиз»,- дейилади авиакомпания хабарида.
Авиакомпания шунингдек, 21 мартдан 31 августгача бўлган чипталар санасида ўзгаришлар бўлиши мумкинлигини маълум қилган.
Turkish Airlines 1 августдан хусусан, Шероз ва Табриз (Эрон), Бағдод, Арбил ва Сулаймония (Ироқ), Кувайт, Абу-Даби ва Дубай (БАА), Ар-Риёд, Даммом ва Жидда (Саудия Арабистони), Мумбай ва Нью-Дели (Ҳиндистон), Бишкек (Қирғизистон), Тошкент (Ўзбекистон), Константин ва Вахран (Жазоир), Александрия, Хургада ва Шарм ал-Шайх (Миср), Тунис, Дуала ва Яунде (Камерун), Найроби (Кения), Акра (Гана), Кейптаун ва Йоханнесбург (ЖАР), Дор-ус-Салом ва Занзибарга (Танзания) парвозларни тиклашни режалаштирган.
Аввалроқ Ўзбекистон Транспорт вазирлиги хорижий давлатлар авиация маъмуриятларига Ўзбекистон Республикасига авиакомпанияларнинг мунтазам парвозларни амалга оширишга ҳали рухсат берилмаганлиги тўғрисида ноталар юборилганини маълум қилганди.
