Жазоир суди мамлакатнинг икки собиқ бош вазири Аҳмад Уяхью ҳамда Абдулмалик Селляля устидан ҳукм чиқарди. Йирик тадбиркор Муҳиддин Тахкутунинг ноқонуний фаолиятига шароит яратиб бергани учун икки собиқ бош вазир ўн йилдан қамоқ жазосига ҳукм қилинди.
Фото: Reuters
Бу ҳақда Al Arabiya'га асосланиб ТАСС хабар бермоқда.
Манбада айтилишича, собиқ бош вазирлар қўшимчасига 500 минг динордан (4 минг АҚШ доллари) жаримага ҳам тортилган. Олдинроқ бу икки собиқ бош вазир коррупцияда айбланиб, 12 йилдан қамоққа ҳукм қилинган ва улар аллақачон жазони ўтаётганди. Энди улар умумий ҳисобда 22 йилни қамоқда ўтказишади.
Маълумот учун, Жазоирда 2019 йилдан буён йирик коррупцияга қарши ҳаракатлар олиб борилмоқда. Унинг доирасида собиқ бош вазирлардан ташқари 8 нафар собиқ вазир пул ювиш, мансабдорларга босим ўтказиш ва ноқонуний бойлик орттириш айби билан 2 йилдан 20 йилгача қамалган.
