Россиялик армия генерали Сергей Суровикин мамлакат Мудофаа вазирлиги делагацияси сафида Жазоирга борган. Бу ҳақда Суровикиннинг атрофидаги манбаларига таяниб «Коммерсант» хабар бермоқда.
«Суровикинга юқори даражадаги ишонч сақланиб турибди. Унинг ташрифи шарқий йўналишдаги эҳтимолий тайинлови билан боғлиқ бўлиши мумкин», дейилади «Коммерсант» хабарида.
13 сентябр куни Сергей Суровикиннинг сурати Жазоирдаги масжидлардан бирининг Facebook саҳифасида пайдо бўлганди. Хабарда «Юқори даражали Россия делегацияси» масжидга ташриф буюриб имом билан учрашгани айтилган.
Суровикин 23 июндаги Евгений Пригожин исёнидан кейин кўринмай қолганди. 4 сентябр куни эса россиялик журналист Ксения Собчакнинг каналида гўёки генерал Суровикин экани айтилган одамнинг сурати эълон қилинди.
2022 йил 8 октябрдан (Қрим кўприги портлатилган кун) 2023 йил 11 январгача Суровикин Россия армиясининг Украинадаги бирлашган қўшинлари қўмондони бўлиб ишлаган, кейин бу лавозимга тайинланган генерал Герасимовга ўринбосар бўлганди. 2023 йил май ойида «Вагнер» хусусий ҳарбий компанияси раҳбари Евгений Пригожин генарал Суровикин гуруҳ ва Мудофаа вазирлиги ўртасидаги воситачи бўлишини маълум қилди.
2023 йил 23 июн куни Пригожин бошчилигидаги вагнерчилар Россия Мудофаа вазирлиги уларнинг позицияларини ўққа тутганини иддао қилиб ҳарбий исюн бошлади. Суровикин вагнерчиларни тўхташга чақириб чиқиш қилган Россия ҳарбий раҳбариятидаги ягона генарал бўлганди. Шундан кейин кўринмай қолган Суровикин ҳақида турли хил миш-мишлар, хусусан, генарал қамоққа олингани ҳақида хабарлар тарқалганди.
