Туркия Тоғли Қорабоғ масаласида Озарбойжонни қўллаб-қувватлашда давом этади. Бу ҳақда Туркия Ташқи ишлар вазири Мавлут Човушўғлу Озарбойжон Президенти Илҳом Алиев билан ўтган музокараларда айтиб ўтди.
Фото: Reuters
“Мен президентимизнинг топшириғи билан келдим. У бу масалада қардош Озарбойжонни ёлғиз қолдирмасликни, Бокуга мунтазам ташриф буюриб, биргаликда ҳаракат қилишни буюрди”, – деб айтган Човушўғлу.
Туркия ташқи ишлар вазирининг таъкидлашича, унинг кўплаб ҳамкасблари ҳозирда Озарбойжонда қолмоқда, бошқа расмий шахслар, жумладан, Мудофаа вазири Хулуси Акар республикага яқин орада келади.
Озарбойжон ва Арманистон ўртасида Тоғли Қорабоғдаги жанговар тўқнашувлар 27 сентябрдан бери давом этмоқда. Икки томон ўртасида ўт очишни тўхтатиш бўйича уч марта келишувга эришилган, бироқ ҳар гал ушбу келишувлар кучга кириши биланоқ бузилган.
