Туркия ва Германия президентлари мамлакатлар ўртасидаги яқинлашув мақсадини тасдиқлади

Штайнмайернинг Туркияга ташрифи чоғида Германия президенти икки давлат ўртасидаги ҳамкорликни янада яқинлаштириш ва яхшилашдан «аниқ манфаатдорлик»ни таъкидлади.

Фото: Bernd von Jutrczenka/dpa/picture alliance

Германия ва Туркия президентлари Франк-Валтер Штайнмайер ва Ражаб Тоййиб Эрдўған 24 апрел, чоршанба куни Анқарада бўлиб ўтган қўшма матбуот анжуманида ўтказган учрашувидан сўнг икки давлат ўртасидаги ҳамкорликни янада яқинлаштириш ва яхшилашдан «аниқ манфаатдор эканини» тасдиқлади.

«Ҳуқуқий аниқлик ва қонун устуворлиги муҳим шартлар», деб таъкидлаган Штайнмайер Туркияга «динамик, демократик, Европага йўналтирилган ривожланиш»ни тилаб. Германия президентининг таъкидлашича, Германия дунёнинг бошқа ҳеч бир давлати билан Туркияда бўлгани каби «яқин оилавий алоқаларга» эга эмас. «Биз бир-биримизга муҳтожмиз», деб хулоса қилди Штайнмайер.

«Биз муносабатларимизни кенгайтириш истагида эканлигимиз аниқ», деди Эрдўған Анқаранинг Германияда «ўнг экстремистик ва ксенофобия кўринишларининг ўсиши»дан хавотирини қайд этиб.

Эрдўғон ғарбни Ғазо сектори аҳолиси азобларига эътибор бермасликда айблади

Туркия президенти ўз нутқида ғарбни Ғазо секторидаги тинч аҳоли азоб-уқубатларига кўз юмаётганликда айблади. Эрдўған Штайнмайер билан учрашувидан сўнг: «Бизнинг немис дўстларимиз бу фожиали вазиятни кўриши керак» деди. У бутун ғарб Исроил томонида турганини қўшимча қилди. Бундан ташқари, Эрдўған Туркияга қурол экспортига қўйилган чекловларни бутунлай бекор қилишга чақирди.

Туркия президенти ҲАМАС гуруҳи билан яқин алоқада, дея эслатади AFP. Германия президентининг ташрифидан бир неча кун олдин Эрдўған ташкилот етакчиларидан бири Исмоил Ҳания билан учрашди. Американинг «Демократияни ҳимоя қилиш жамғармаси» (Foundation for Defense of Democracies, FDD) таҳлил марказига кўра, ҲАМАС Анқарадан нафақат сиёсий, балки молиявий ва моддий ёрдам ҳам олади.

Эрдўған, Исроил расмийларига кўра, 2023 йил 7 октябр куни жангчилар 1200 га яқин одамни ўлдирган ва 240 нафарини гаровга олган ҳодиса - ҲАМАСнинг Исроилга қарши кенг кўламли терактини қоралади. Аммо, шу билан бирга, Эрдўған ҲАМАСни «қаршилик кўрсатувчи гуруҳ» деб атади. Бошқа томондан, у НАТОнинг яқин иттифоқчиси бўлган Исроилни бир неча бор «террорчи давлат» деган.