Миср ҳукумати Қоҳира яқинида жойлашган Саккара некрополида камида 100та қадимий саркофаг топилганини эълон қилди. Улардан баъзиларида мумиёлар бўлган. Аввалроқ ҳам ушбу ҳудудда 59та саркофаг топилганди.
Мисрнинг қадимийликлар ишлари бўйича вазири Холид Ал-Ананийнинг маълум қилишича, топилган саркофаглар Птолемейлар (милоддан аввалги 320-30 йиллар) ва Кечки салтанат (милоддан аввалги 664-332 йиллар) даврларига мансуб.
Ёрқин безатилган саркофаглар Жосер эҳроми тагида ташкиллаштирилган махсус кўргазмада тақдим этилган. Археологлар саркофаглардан бирини очиб, унинг ичида яхши сақланиб қолган мумиёни намойиш қилишган.
Миср расмий идоралари яқин орада Саккарадаги қазилма ишлари вақтида топилган бошқа археологик топилмалар ҳақида эълон қилади.
