«Қувасойцемент» ва «Оҳангаронцемент» газ босими пасайиб кетгани сабаб цемент ишлаб чиқаришни тўхтатди, дея хабар бермоқда Монополияга қарши кураш қўмитаси.
Маълум қилинишича, сўнгги кунларда ҳаво ҳароратининг кескин пасайиши аҳолининг газга бўлган эҳтиёжини оширган. Натижада цемент ишлаб чиқарувчиларга етказиб бериладиган газ босимининг пасайишига ўз таъсирини кўрсатган.
Бунинг оқибатида эса «Қувасойцемент» ва «Оҳангаронцемент» томонидан цемент ишлаб чиқарилиши тўхтатилган. Шу боисдан, иккала ишлаб чиқарувчининг цемент маҳсулоти ўтган ҳафтада фонд биржа рўйхатига олинмаган.
Мазкур вазиятдан келиб чиқиб, бўлиб ўтган савдоларнинг ўртача кунлик ҳажми 30 минг тоннани ташкил этган. Бу аввалги белгиланган 46 минг тонна ҳажмдаги савдоларга нисбатан 34 фоизга камайганлигини кўрсатмоқда.
Сотилган цемент ҳажми 141 минг 919 тоннани ташкил этган. Бу аввалги кимошди савдосида сотилган цемент ҳажмидан 68 минг 456 минг тоннага камдир. Бу ҳолат савдо ҳажмининг ҳам пасайиши, унинг нархининг ошишига олиб келган. Ҳафта бошида 1 килограмм цемент 512 сўм бўлган бўлса, ҳафта охирида у 539,1 сўмгача (ёки 5 фоизга) кўтарилган.
Мазкур ҳолат савдо иштирокчилари камайишига ҳам ўз таъсирини кўрсатди. Сотувчилар 1054 дан 817 нафарга камайган бўлса, харидорлар 556 нафардан 373 нафаргача камайганини кузатиш мумкин.
25 ноябр куни телеграмдаги Bakiroo канали муаллифи ижтимоий тармоқда билдирилган маълумотга асосланиб, «цемент ишлаб чиқарувчи гигантлар «Оҳангаронцемент» ва «Қувасойцемент» ишлаб чиқариш қувватлари газ таъминотидан узилган»и ҳақида хабар берганди. Канал муаллифининг ёзишича, бу ҳолат гарчи мавсум бўлмаса-да, цемент нархларининг кескин кўтарилишига олиб келган.
Кейинроқ Энергетика вазирлиги Ўзбекистонда цемент ишлаб чиқарувчи заводларга электр энергияси етказиб берилиши тўхтамаганини маълум қилди.
Товар хомашё биржа маълумотига кўра, шу йилнинг 20 ноябр куни «Оҳангаронцемент» АЖ томонидан биржа савдоларига қўйилган портландцементнинг (ПЦХ) 1 тоннаси ўртача 504 минг сўмдан сотилган. Шу куни «Қувасойцемент» АЖ томонидан савдога қўйилган М-400 цементининг 1 тоннаси ўртача 631 минг сўмга сотилган.
23 ноябр куни «Оҳангаронцемент» АЖ биржа савдоларида иштирок этмаган. Шунингдек, «Қувасойцемент» АЖ ҳам бозорда таклиф билдирмаган. 20 ноябрда 40 минг 394 тонна турли сифатдаги цемент биржа савдоларига қўйилган бўлса, уч кун ўтиб, ушбу кўрсаткич қарийб 9 минг тоннага камайган. 24 ноябр куни якунланган биржа савдоларида 1 тонна цементнинг ўртача нархи 520 сўмгача кўтарилган бўлиб, 4 кун ичида ўртача 20 сўмлик нарх ошиши кузатилган. «Оҳангаронцемент» АЖ ва «Қувасойцемент» АЖ биржа савдоларида 24 ноябрда ҳам иштирок этмаган.
Биржа вакили Kun.uz’га берган интервьюсида кейинги йил феврал ойига қадар цемент нархи кескин кўтарилиши кузатилмаслигини айтиб ўтганди.
