Оқ уйнинг билдиришича, АҚШ президенти фуқаролар билан доимий мулоқот қилиб боришни режалаштирган.
АҚШ президенти Жо Байден пандемия сабабли ўтган йили ишини йўқотган калифорниялик Мишел исмли аёл билан телефон орқали суҳбатлашди ва унга ўзининг иқтисодиётни рағбатлантириш бўйича чора-тадбирлар дастури ҳақида сўзлаб берди. Ушбу суҳбат тўғрисидаги видеолавҳа Байденнинг Twitter саҳифасида жойлаштирилди.
Байденнинг ёзишича, аввалроқ Мишел президентга мактуб ёзган.
"Ғоямиз шуки, бизнесни қайтадан очишни истаймиз. Биз ёрдамга муҳтож одамларга зудлик билан кўмак берадиган режа қабул қиламиз. Бу кичик бизнеснинг очилишига ёрдам беради", - деди АҚШ президенти.
У шунингдек, ҳукумат яқин 100 кун ичида 100 млн кишини эмлашга эришиш ниятида эканлигини эслатди.
Last year, Michele lost her job because of the pandemic. I recently gave her a call to hear her story and discuss how my American Rescue Plan will help families like hers. pic.twitter.com/SAqM2GytPf
— President Biden (@POTUS) February 6, 2021
Оқ уй матбуот хизматининг маълум қилишича, ушбу суҳбат Байденнинг аҳоли билан мунтазам мулоқот қилиш борасидаги дастурининг бир қисми ҳисобланади.
Байденнинг 1,9 трлн доллар миқдоридаги иқтисодий режасида бевосита пандемияга қарши курашиш учун 400 млрд доллар атрофида маблағ ажратиш кўзда тутилган. Бир трлн долларга яқин маблағ аҳолига ёрдам кўрсатиш, қолган қисми эса иқтисодиётни рағбатлантиришга йўналтирилади. 29 январ куни Байден конгрессни мазкур ташаббусни тезроқ қабул қилишга чақирди.
