Жорий йилнинг 5 февраль ҳолатига кўра, Ўзбекистонда Хитойнинг коронавирусга қарши ZF 2001 вакцинаси синовида иштирок этиш учун умумий ташриф буюрганлар сони 14 008 нафарни ташкил этмоқда. Бу ҳақда Инновацион ривожланиш вазирлиги ахборот хизмати хабар берди.
Маълум қилинишича, ушбу кўнгиллилардан 6 484 нафари вакцинанинг 1-дозаси билан ва 1 045 нафари вакцинанинг 2-дозаси билан эмланди.
Вакцина олиш истагида келган ҳар бир фуқаро рўйхатдан ўтказилади. Улар билан тушунтириш ишлари олиб борилади. Кейин эса тартиб-қоидага мувофиқ, унинг антропометрик белгилари - бўйи ва вазни ўлчанади. Шунингдек, иммунофермент (ИФА) таҳлил синамасини олишга кўрсатма берилади. Ушбу текширувнинг натижаси 20 дақиқа ичида тайёр бўлади.
“Бу таҳлил орқали қонда вирусга қарши антитаначалар бор ёки йўқлигига аниқлик киритилади. Бу фуқаро олдин коронавирусга чалинмаганлигини билиш учун керакли фактордир”, дейилади хабарда.
