Франция ҳукумати мамлакатнинг 16та департаментида эпидемик вазият ёмонлашгани сабабли 4 ҳафталик карантин киритишга қарор қилди. Карантин вақтида озиқ-овқат дўконларидан бошқа барча дўконлар ёпилади.
Франция бош вазири Жан Кастекснинг маълум қилишича, гап пойтахт Париж жойлашган Ил-де-Франс регионидаги 8та, шимолдаги О-де-Франс регионидаги 5та ҳамда Денгизбўйи Алплари (жануб), Денгизбўйи Сена (ғарб) ва Эр (ғарб) департаментлари ҳақида бормоқда.
“Агар зарурат бўлса, янги чекловларни қолган департаментларга ҳам жорий қиламиз”, деб айтган Кастекс. Унинг таъкидлашича, карантин режими 20 март соат 00:00дан амал қила бошлайди. Комендантлик соати бошланиши эса барча департаментларда соат 18дан 19га кўчирилади.
Карантин вақтида озиқ-овқат дўконларидан бошқа барча дўконлар ёпилади. Уйдан 10 кмдан кўпроққа олислашга рухсат берилмайди. Спорт билан шуғулланиш тақиқланмайди.
Франция бош вазирининг маълум қилишича, шифохоналарга тобора кўпроқ ёшлар келтирилмоқда, беморларнинг шифохоналарда даволаниш муддати эса тобора чўзилмоқда.
Шунингдек, 19 мартдан аҳолини AstraZeneca вакцинаси билан эмлаш давом эттирилади. Аввалроқ ушбу вакцинани қўллаш у эмланганларда тромб ҳосил қилиши мумкинлиги сабабли вақтинча тўхтатиб қўйилганди.
Кастекс ҳукумат апрел ўртасигача 10 млн, июн ўртасигача эса 30 млн аҳолини (мамлакатнинг эмлашдан ўтиш истагини билдирган катта ёшли аҳолисининг учдан икки қисми) эмлаш вазифасини ўз олдига қўйганини маълум қилган.
Бош вазирнинг таъкидлашича, охирги ҳафтада Францияда коронавирус тарқалиши жадаллашган. “Пандемия билан боғлиқ вазият ёмонлашди. Охирги ҳафтада биз вирус тарқалиши суръатлари тезлашганини кўрмоқдамиз. Бизнинг вазифа - вазиятни назорат остидан чиқариб юбормаслик”, деб айтган бош вазир. Унинг айтишича, ҳозирда Францияда эпидемиянинг учинчи тўлқини кузатилмоқда ва Бретан регионида вируснинг янги штамми аниқлангани вазиятни янада оғирлаштирди.
