Франция РФ разведка хизмати раҳбарининг Украина учун ҳарбийлар ҳақидаги сўзларини рад этди

Франция Қуролли кучлари вазирлиги Россия ташқи разведка хизмати директори Сергей Наришкиннинг Париж томонидан Украинага жўнатилиши учун 2 мингга яқин ҳарбий хизматчи тайёрланаётгани ҳақидаги баёнотини рад этди. Франция агентлигининг 19 март, сешанба куни таъкидлашича, Россия разведка хизмати раҳбари баёнотлари «Россия оммавий дезинформациядан тизимли фойдаланиши яна бир намунасидир». Париж «максимал ҳушёрликка» чақирди.

Шу куни эрталаб Сергей Наришкин Франция Украинага жўнатиш учун ҳарбий контингент тайёрлаётганини айтган эди. Бу кучлар Россия армияси томонидан «ҳужумларнинг устувор қонуний нишонига» айланади, деди ТРХ раҳбари.

Макроннинг Украинага қўшин юбориш эҳтимоли ҳақидаги баёнотига муносабат

Феврал ойи охирида Украинани қўллаб-қувватлашга бағишланган анжуманда Франция президенти Эммануэл Макрон Украинага НАТОга аъзо давлатларнинг қуруқликдаги қўшинларини юбориш имкониятини истисно этмади. «Бугунги кунда қуруқликдаги кучларни Украинага расман юбориш масаласида консенсус йўқ, аммо воқеалар ривожида ҳеч нарсани инкор этиб бўлмайди», деди у.

Кейинроқ Макрон аниқлик киритишича, ҳозирча Украинага ҳеч қандай ҳарбий хизматчи жўнатиш ҳақида гап йўқ, келажакда бирор контингент юборилса, у жанговар ҳаракатларда қатнашмайди. 

Франция президентининг нутқидан сўнг, Украинага қўшин юбориш ғояси кўплаб Ғарб давлатлари, жумладан Германия, Болгария, Британия, Венгрия, Испания, Италия ва Чехия томонидан рад этилди. НАТО бош котиби Йенс Столтенберг НАТО Украинага қўшин жўнатиш ниятида эмаслигини таъкидлади.

Германия мудофаа вазири Борис Писториус бу борадаги баҳс-мунозараларни тўхтатишга чақирган бўлса, унинг финландиялик ҳамкасби Антти Хяккянен Киевни қурол-яроғ, ўқ-дори ва пул билан таъминлашга эътибор қаратиш зарурлигини таъкидлади. Шу билан бирга, Литва ва Латвия Макроннинг позициясини қўллаб-қувватлади.